Isumat.com/Oktubre 3, 2022
An hingyap nga makagtapos ha kolehiyo ngan makagpakabuhi in naanaw para hin usa nga estudyante tungod han iya kalumos samtang nangangarigos upod an iya kasangkayan ha usa nga baybayon ha Baybay City, Leyte hadin Biernes, Setyembre 30, 2022.
An Baybay City Police Office in nagkilala han biktima nga hi Anro Guden, 21 anyos ngan residente han Brgy Masarayao, Kananga, Leyte.
Hiya in estudyante ha Visayas State University ngan nakatalaan makagtapos han kurso nga Environmental Science yana nga school year.
Sumala han mga imbestigador, nagkasarabot an biktima ug an iya mga kaupod ha boarding house nga mangarigos ha baybayon han Brgy Guadalupe ug pumakadto hira han lugar pasado alas 7 han gab-i.
Samtang nangangarigos hira, na obserbaran nga nawara tigda hi Guden ngan alas 9:30 na nira nakit-an nga nalumos hiya. Gintalinguha han mga kasangkayan nga katagan hin first aid an ira kaupod pero napakyas hira, sanglit gindara ha hospital pero igindeklarar nga dead on arrival han mga doktor. #
