Isumat.com/Setyembre 28, 2022
Nahibutang ha peligro an benipisyo ngan trabaho hin usa nga empleyado han Department of Education-Eastern Visayas han ma-aresto hiya tungod han reklamo nga pagkawat hin 85 Mil pesos.
Ha report han Criminal Investigation and Detection Group (CIDG)-Eastern Samar Field Office, ginkilala an suspetsado nga hi Nieto Yerro, 56 anyos, inasaw-an, empleyado han DepEd komo drayber, ngan residente han Brgy 74, Tacloban City. Emplyado hiya ha DepEd hin sobra na 20 anyos.
An tagreklamo hi Franklin Robedizo, Provincial Board Secretary han Eastern Samar ngan nag-uukoy ha Brgy Bato, Borongan City. Hi Robedizo in nagreklamo nga nawara an nasabi nga kwarta didto han iya sarakyan nga pick-up ha compound han Melindas Resort ha Borongan.
Hi Robedizo upod an mga kaapi han komitiba han Provincial Council in mayda meeting didto han mao nga resort hadton Setyembre 27. Iginkatuman liwat nga mayda conference an mga DepEd Personnel didto han nasabi nga resort.
Pagbalik han biktima ngadto han iya sarakyan, nadiskubrehan niya nga waray na didto an kwarta. Kadagmitan nga ginkita nira an CCTV Footage han resort ug didto nira nakit-an nga gin-abrihan ni Yerro an porta ha driver’s side ngan gin-abrihan liwat niya an portahan ha likod han sarakyan. Pakakuha han salapi, binmalik an suspetsado ngadto han iya ginmamanehoan nga sarakyan.
An biktima in nangaro dayon hin ayuda ha mga otoridad ngan kadagmitan naghimo hin hot pursuit operation an mga operatiba han CIDG ha panguna ni PSMS Mark Anthony Estrobo kaupod hira PEMS Maribel Bersoza, PCpl Mark Malatbalat ngan Patrolman Jannrey Daamo.
Nakakarawat hin impormasyon hi Robedizo kun hain na an lokasyon han suspetsado ngan kadagmitan ginhalpat han mga kapulisan.
Hi Yerro in na-aresto alas 8:30 han gab-i, Setyembre 27, 2022 ha Loleng Lodge, Brgy 2, Paranas, Samar.
Sumala han report han CIDG, gin-angkon ni Yerro nga hiya an kumuha han kwarta, pero an nahibalik niya ngadto han mga otoridad in 52, 500 pesos nala. Iginpa-ilarum hin dokumentasyon ngan kaangayan nga disposisyon ha Paranas PNP Station an suspetsado ngan gin-aandam na yana an pagsalawad hin kaso nga Theft ha Borongan City Prosecutors Office.
Nakabulig gihapon dida han operasyon an mga elemento han 805 PNP Regional MObile Force Battalion ngan Paranas, Samar Municpal Police Office.
Dida han iya post ha facebook, hi Robedizo in tim-os an pagpasalamat ha CIDG-Eastern Samar ha panguna ni PMajor Orlando Silla, upod na gihapn an taga DedEd Eastern Samar Division ngan Melindas Resort tungod han ira kooperasyon.
Sering pa niya, bisan kun kulang an nahibalik ha iya nga kantidad, iya gihapon nakaplagan an hustisya tungod han mamurayaw nga pagsurender ngan pag-admiter han suspetsado han iligal nga binuhatan.
Iginsumat han tagreklamo nga iya gin-utang ha pribado nga Lending Company adto nga kantidad para han kabaraydan han iya mga anak ha eskwelahan.#
