Isumat.com/Setyembre 28, 2022
Haros okuparan ngatanan han Leyte Normal University (LNU) an pwesto ha Top 10 han malinangpuson nga nagpakapasar han Licensure Examination for Social Workers nga gindumara yana nga Setyembre 2022.
Ini in tungkod kay walo nga produkto han unibersidad in nakatugpa ha Top 10 han nasabi nga eksaminasyon nga iginpagawas an resulta Setyembre 27, 2022 han Professional Regulations Commission (PRC). Dida han 4,723 nga examinees, 2,955 an nakapasar.
An taga La Paz, Leyte nga hi Fiona Yvannie Murillo an nagin 3rd placer pinaagi han iya grado nga 87.80%. Samtang hi Geralene Terceno an nakakuha han ika-unom nga pwesto (87.20); ug ikapito naman hi Eduard Canares (87.00).
Taga LNU gihapon an nagtarabla ha ikawalo nga lugar. Amo ini hira Mary Guen Sablayan, Erika Setosta ngan Christelle Erika Toring nga naka-angkon hin rating nga 86.60.
An ika-siyam amo hi Pamela Jane Pido (86.40) samtang hi Nicu Bernard Baylos an 10th placer (86.20).
Labot la hini, an LNU an nagin numero uno han Top 10 Performing schools para han yana nga tuig nga eksaminasyon. Syento Porsyento an passing rate han LNU yana nga tuig.
An nanguna han mao nga board exam amo hi Gian Paul Salanio han UP-Diliman nga may grado nga 88.80%. #
