Isumat.com/3:12PM, June 7, 2020
Kun hi Gobernador Rogelio Espina la an papapagbut-on, igbabalik niya an pagpasunod han Enhanced Border Closure ha probinsya han Biliran.
Dida han iya facebook account, hi Espina an nagpahungaw han iya sentimento kasumpay han natabo nga positibo nga kaso han COVID-19 ha Biliran ug an nagtitikadamo nga kaso ha iba nga mga lugar ha Eastern Visayas. Ini an rason han pagpaki-ana han gobernador ha iya nasasakupan kun kun gusto ba nira igbalik an Enhanced Border Closure nga ira igin-implementar hadto.
An Doctor-Governor in naghihingyap ngan naglalaum nga tagan unta hin konsiderasyon han National Government ini nga iya paghangyo.
Hi Espina in maaram nga an National Government an nagdedesisyon kun ano an magigin kahimtang han usa nga probinysa, kun ECQ, GCQ o MGCQ an igpapatuman. Sering niya, deri niya karuyag rumiwa han patakaran han National Government pero ini nga iya pag-apilar in tungod han peligro nga namimintana yana ha Biliran dara han pakasulod han virus ngadto. Nagpabati gihapon hin kabaraka an opisyal han kapasidad han iya probinsya ha pagsupil han virus kun deri na kabalabgan an pagdamo han kaso.
Sumala pa ha iya, hadton Enhanced Border Closure ngan General Community Quarantine, waray nahitabo nga nag positibo han virus ha Biliran, pero han paghukal han mga guidelines dara han MGCQ, nakalusot na an ginkakahdalukan nga kagaw.
Dara han MGCQ, waray natabo nga tuhay nga koordinasyon tikang ha Manila kay nagparaboot la pag-uli an usa nga residente ngan waray magsumat ha ira. Ini nga residente an nagpositibo han virus ngan pira nga mulopyo an naka-kwarentina yana dara han contact tracing. Ini in labot la han nagtitikahilaba nga listahan han mga Positive Cases ha mga syudad ngan bungto nga harani han Biliran. Ha maabot nga mga adlw, magtitikadamo pa an magkaka-abot tikang han mga ECQ nga lugar kun diin damo an natapnan han corona virus.
Dara hini nga sitwasyon, hi Espina in nagdig-on nga deri unta mag-relax an mga patakaran, lugod kinahanglan mag-implementar hin mga aksyon basi makabaton han presente nga sitwasyon.
Nagproponer an gobernador ha National Government nga tagan hin dako nga pondo an pag-swab test han ngatanan han karuyag umuli ha probinsya. Deri angay pabalikon ha probinsya kun waray negatibo nga resulta an swab test. Kun deri ini himoon han National Government, an mga Balik-Probinsya in maghihimo nala hin kalugaringon nga diskarte ngan makaka-uli bisan waray klaro nga koordinasyon ngan waray salabutan kun nagdadara na han COVID-19. # (KEVIN SIOSANA)
