Isumat.com/7:35AM,July 01, 2020
Tikang ha Modified General Community Quarantine (MGCQ) iginbalik an implementasyon han General Community Quaratine (GCQ) para han mga probinsya han Leyte, Southern Leyte ngan syudad han Ormoc. Ini an lakip dida han bag-o nga kamanduhan ni Presidente Rodrigo Duterte kasumpay han klase han mga kwarentina nga igpapasunod ha magkalainlain nga parte han nasud tobtob Hulyo 15, 2020.
Hapagkayana, an nasabi nga mga lugar in tigda nga naghataas an ihap han mga Positive Cases kun diin kasagaran han natapnan an mga Locallly Stranded Individuals. Ini an nagin rason nga iginbalik an GCQ hini nga mga parte han Region 8.
Ha ilarum han GCQ, igpapatuman an limitado nga kiwa han mga tawo ngan transportasyon ug an mga tinubyanan han balaud an igpapasarang basi maseguro nga susundon han publiko an mga patakaran.
Ha luyo nga bahin, ginbulag naman ha duha nga klase an MGCQ. Amo ini an MGCQ with Strict Local Action ngan MGCQ Low Risk.
An Tacloban City ngan probinsya han Samar in iginpa-ilarum ha MGCQ with Strict Local Action. Dida hini nga mga lugar, an mga LGU in puede magmando hin mga lockdown ha mga barangay ngan sitio nga apektado han virus ngan istrikto an pagpasunod han health protocols.
An iba nga parte han Eastern Visayas sugad han Northern Samar, Eastern Samar ngan Biliran in iginbutang ha Low Risk MGCQ. Igintutubyan ha mga opisyal hini nga mga lugar an diskarte o mga pamaagi basi kalikyan an pakatapon ngan pagsarang han corona virus.
An Metro Manila an iginpabailin ha GCQ, samtang igpapadayon an ECQ ha Cebu City.
Ini nga bag-o nga mga patakaran an iginpahayag ni Duterte kanina han ala-1 han maagahon (Hulyo 1). #
