Isumat.com/12:56PM, August 12, 2000
Mabido-on nga iginpasamwak kanina han aga han DOH Regional Office nga may nahidugang nga duha katawo ha mga nagkamamatay tungod han COVID-19 ha Sinirangan Bisayas. Dara hini, unom na nga pasyente han virus ha rehiyon an tumalikod ha kadayunan.
Dida han press conference nga gindumara han ahensya, iginsumat han mga otoridad ha panlawas nga an duha nga binawi-an hin kinabuhi in mga senior citizens nga taga Ormoc ngan taga Dulag. An Ormocanon in 80-anyos nga lalaki nga nakabalik ha Ormoc tikang ha iba nga lugar. Nagreklamo hiya nga naghimakuri an iya pag ginhawa ngan namatay hadton Agosto 7, usa ka adlaw antis gumawas an resulta nga positibo hiya han kagaw.
An Dulagnon in 74-anyos nga babaye nga waray travel history ngan waray liwat igka-urusa hin LSI. Na-admit hiya ha pribado nga hospital ha Tacloban hadton Agosto 6 ngan namatay han Agosto 11. Iginsumat pa han DOH nga an babaye in maiha na nga may gin-aantos nga iba nga sakit.
Iginlubong dayon an mga pasyente ha sulod hin 24 oras tikang han ira kamatay. Gin-iimbestigar yana han DOH ini nga duha nga kaso hin pagkamatay.
Iginbuyagyag gihapon han DOH nga nagdudumara na hira hin imbestigasyon han lima nga nagbabantay hin mga pasyente ha EVRMC-Magsaysay nga nagpositibo han virus. Ini nga pitad in agud masabtan kun kay-ano nga nagsunod-sunod an mga nagkatatapnan nga bantay han mga pasyente ha EVRMC.
Nag-report liwat an DOH nga nagtitikadamo an mga lugar ha Eastern Visayas nga nagkaada hin Local Transmission an virus. An mga lugar nga gintudlok han DOH nga mayda Local Transmission amo ini: (Leyte) Tacloban, Ormoc, Palo, Dulag, Carigara, Barugo, Tanauan, Matag-ob; (Samar) Calbayog, Catbalogan, Basey, Villareal; (Eastern Samar) Lawaan, Giporlos, Oras; ngan Almeria, Biliran.
Dida hini nga mga lugar may nagpositibo han kagaw nga deri natutudlok kun hin-o an nakatapon o diin katapni an pasyente, pagklaro han DOH.
Igindig-on naman han Eastern Samar Provincial Health Office nga deri Local Transmission an nahitabo ha Oras kay para ha ira, an sundalo in usa nga LSI ngan waray katapni didto han nasabi nga munsipalidad. An pahayag han DOH-Regional Office nga mayda Local Transmission didto han bungto in nakagdurot hin pagkabaraka han katawhan.
Paghagos hin lima ka oras tikang han press conference, ginbawi han DOH Regional Office an naha-una nira nga pahayag nga may Local Transmission ha Oras. An pasyente nga nadadabi didto han nasabi nga bungto in usa nga sundalo nga bumalik ha ira kampo didto han bungto tikang han iya pagbiyahe ngadto ha Laguna. (Updated 5:00PM, August 12, 2020)
Hapagkayana, 1,363 na an natapnan ha Eastern Visayas ngan 927 (68%) an naka-recover tikang han impeksyon han Covid-19. #
