Isumat.com/Agosto 24, 2022

Kinahanglan magkaada hin bastante nga tulay an mga Estehanon ngadto ha kongreso basi maka-agom han ginkikinahanglan nga pondo para han mga proyekto nga makakapa-uswag han probinsya.

Ini an panguna nga rason ni 4Ps Partylist Representative Marcelino “Nonoy” Libanan kun kay-ano nagsalawad hiya hin balaudnon ha kongreso may panuyo nga mag-establisar hin ikaduha nga congressional district ha Eastern Samar.

Ha ilarum han House Bill 3647 nga iginpasaka ni Libanan, pagbubulagon an probinsya ngadto hin duha ka distrito basi magkaada hin makusog nga representasyon an mga Estehanon ha kongreso. Igindig-on han magbabalaud nga an lalawigan in nakakuha na han mga rekisitos nga kinahanglan para magkaada hin duha nga distrito.

Hi Libanan, nga amo gihapon an House Minority Leader in nagpahayag nga tikang han 1965 han igbulag an Eastern Samar tikang ha Probinsya han Samar, nagin doble na an populasyon han Este. Iginlalarang han konstitusyon nga kada distrito in porlomenos 250 Mil an katawhan, ngan dida han census han 2020, mayda na 478 Mil nga popolasyon an probinsya.

An Eastern Samar in ginkokomponer hin 22 nga municipalidad ug an syudad han Borongan an nagseserbe nga kapital han probinsya.

Dida han balaudnon ni Libanan, an mga lugar nga masasakop han 1st District amo an Borongan City, ug an mga bungto han San Julian, Sulat, Taft, Can-avid, Dolores, Maslog, Oras, Jipapad, San Policarpo ngan Arteche.

Ha luyo nga bahin an mga bungto han Balangkayan, Maydolong, Llorente, Hernani, Gen MacArthur, Salcedo, Mercedes, Guiuan, Lawaan, Giporlos, Quinapondan ngan Balangiga an magkokomponer han ikaduha nga distrito.

Hapagkayana, hi Congresswoman Fe Abunda an nalingkod komo tinaglawas han nag-uusaan nga distrito han probinsya.

Hi Libanan in nagin kongresista han probinsya hin tulo ka termino tikang han 1998 tobtob han 2007.# (with report from Manila Times)