Isumat.com/Agosto 23, 2022
Padayon an paningkamot han mga tropa han gobyerno nga makakuha hin mga higamit ngan mga lawas hin tawo ha kadagatan nga nasasakop han Catbalogan City, Samar.
Ini an iginpahayag ni Capt Ryan Layug, tagyakan han 8th Infantry Division han Philippine Army ha interview han iFM-RMN, yana nga aga, Agosto 23, 2022. Ini in may paghisumpay han natabo nga engkwntro kakulop han maagahon didto han nasabi nga lugar kun diin nagbublag an motorboat nga ginsasakyan hin armado nga katawhan tungod hin makusog nga pagbuto ha sulod mismo han ira sarakyan.
Ini nga panhitabo in nagin dako nga iristoryahon kay lumutaw an mga ngaran han mga High Ranking NPA Leaders Benito ngan Wilma Tiamzon nga upod daw han armado nga grupo.
Nagsering hi Layug nga kakulop han kulop, gin-undang an pamiling tungod kay maraot an panahon ha kalalawdan, pero yana nga aga nagpadayon an search and retrieval operations. Ngani, nakigbinuligay na an militar ha mga mulopyo ha magkalainlain nga mga barangay harani han lugar nga magsumat ha ira kun mayda nira mabilngan nga mga gamit o tawo nga posible nadadabi han panhitabo.
Iginsumat gihapon ni Layug nga dako an posibilidad nga may karga nga Anti Personnel Bomb an sarakyan, sanglit bumuto ini.
Usa gihapon han posibilidad nga diversionary tactic ini han grupo han mga terorista basi maka-eskapo hira Tiamzon kun tinood nga upod hira han grupo. Posible nga paglipat-lipat ini basi mawara ha focus an mga kasundaluhan, pahayag pa han opisyal.
Ginklaro pa ni Layug nga dida han gab-i antis an panhitabo, an tipster in nagsumat ha militar nga mayda nagkakarga hin mga kahon ngadto hin motorboat didto han nasabi nga lugar. Pag-abot ngadto han mga sundalo, nakabiyahe na an motorboat ngan ira ini ginlanat ngan nagkaada hin pupsilay kay nagpabuto an sakay han motorboat han magpasabot an militar nga maghihimo hira hin inpsection.
Nagsering pa an Army Captain nga posible nga naglilinook ha Samar an mag-asawa nga Tiamzon labi na nga pira na nga higtaas nga opisyal han terorista nga grupo an nagkadadakop ha Samar han nag-agi nga mga bulan.
Napapa-usa gihapon hi Layug kun kay-ano nga gumawas ha internet ngan social media an mga ngaran nira Tiamzon kakulop samtang hadto nga takna in waray pa ngani kapipirmahi an spot report han Philippine Army.#
