Isumat.com/9:12AM,June 30,2020
Gin-iiliw han Department of Education-8 an mga estudyante tikang ha kindergarten tobtob ha Senior High School, kay duha ka adlaw antis an pagtapos han pagparehistro, 43 porsyento pala an nagpalista.
Dida han interview kan Deped Regional Information Officer Jasmin Calzita ha programa nga “Straight to the Point” ni Eduard Sanagan ha 99.1 iFM-RMN, hinsabutan nga tobtob han Hunyo 28, waray pa ngani 50 porsyento an nagpa-enroll ha Region 8. Iginsaysay ni Calzita nga naglalaum hira nga 1.2 Million nga estudyante an magpapa-enroll, pero tobtob han Hunyo 28, naabot pala hin hin 554 Mil an nagparehistro. Yana nga adlaw (Hunyo 30) amo an katapusan nga adlaw han pagpa-enroll.
Usa gihapon nga rason han habubo nga enrollment kay kadam-an nga pribado nga eskwelahan in waray pa magtikang han registration.
Pero ginklaro ni Calzita nga subay han nababatasan, makarawat pa gad an DepED han mga atrasado nga mapalista kay deri puede bumaribad an eskwelahan kun mayda mapalista bisan tapos na an enrollment period.
Igindugang pa ni Calzita an mga rason kun kay-ano nga habubo an enrollment. Nangunguna denhi an pandemya han COVID kun diin nahahadlok an mga kag-anak nga matapnan an ira mga anak kun masulod ha eskwelahan. Aada gihapon an on-line enrollment, sanglit an iba deri nakakarehistro kay waray o maluya an internet service.
Ginlalauman naman han DepED nga sunod nga semana mahitaas an lista han enrollment kay hapagkayana, nagpapadayon an encoding han records ngan igpapasa an pinal nga rehistro sunod nga semana. Igindugang pa ni Calzita nga nasasagipo yana an mga maestra han pagbiling ngan pagkontak han ira mga estudyante basi aghaton nga magpa-enroll.
Ginsayod gihapon ni Calzita nga deri nira pipiriton an mga kag-anak nga igpalista an ira mga anak, pero magpapadayon an ira serbisyo pagtutdo hin kina-adman ha mga kabataan. Gintatalinguha gihapon han ahensya nga makaplastar hin mga pamaagi han pag-eskwela nga deri magagastuhan an mga kag-anak. # (KEVIN SIOSANA)
