Isumat.com/ Disyembre 30, 2022
Ha bug-os niya nga kinabuhi, waray gud sumulod ha iya hunahuna nga maabot an panahon nga maapi hin beauty pegeant, pero kakulop, Disyembre 29, 2022, hi aktres ngan anay Tacloban City Mayor Cristina Gonzales an napili nga 2022 Noble Queen Universe.
An coronation ceremony in gindumara ha Prince Hotel, Tokyo, Japan kun diin an Top 8 han paisan-isan amo an gintagan han ira tagsatagsa nga pasidungog.
Hi Cristina amo an nagrepresentar han Noble Queen Philippines-Visayas para han nasabi nga kompetisyon kun diin panuyo han mga organizers an pagpahaluag han ira charity work ngadto han mga kablas nga sektor ha magkalainlain nga parte han kalibutan.
Sumala kan Cristina, nakumbinser hiya pag-api han contest tungod kay maiha na hiya nga nadadabi hin mga charity works ha Pilipinas, labi na ha Tacloban City. Pinaagi hini, mas magigin haluag pa an iya masasakop nga mga lugar ha pagpadangat hin serbisyo ngadto han mga nagkikinahanglan.
Kaapi han Top 5 labot la kan Gonzales amo an mga pambato han Guam, Japan ngan Amerika.
Hadton 2019, hi Pinay aktres Patricia Javier an nakadaog han nasabi nga titulo ngan hiya an nagkinumbinseron han Cristina nga umapi han kompetisyon. #
