Isumat.com/ Disyembre 30, 2022
Nagin trahedya an ginlalauman unta nga malipayon nga pagtapo han bag-o nga tuig hin usa ka pamilya nga taga Northern Samar han maawat an ira kinabuhi ha dako nga sunog ha Quiapo, Manila, Disyembre 29, 2022.
Dida han insidente, unom ka tawo an namatay kun diin lima ha ira in kaapi hin usa la nga pamilya nga taga Allen, Northern Samar.
An mga biktima in ginkilala nga hira Daniel Perito Cayetano, 28 anyos; Jofie Mae Porio, 30; Cyrus Porio Cayetano, 5; ug an magkaruha nga hira Cheska Camille ngan Cheska Celina Porio, 12 anyos.
An ika-unom nga biktima in 63 anyos nga lalaki nga deri paryente han pamilya Porio-Cayetano.
Iginsumat hin usa nga nasunugan, nga kasagaran han mga residente ha Arlegui St amo in mga taga Allen ngan hira in nananawagan para hin bulig.
An patay nga lawas han mga biktima in natad-an ha ground floor hin upat ka andana nga residential building. Nagsering an BFP porlomenos 500 ka pamilya an apektado han kalayo nga balor hin 5 Milyones pesos an danyos.
Nagtikang an kalayo pasado alas 2 han maagahon ngan igindeklarar nga fire-out alas 8-30 han aga.
Tobtob yana, gin-iimbestigar pa kun ano an nagin hinungdan han panhitabo.#
