Isumat.com/ Disyembre 26, 2022

Pagpakabuhi para han pamilya an hingyap nagin dako nga kasakit an nagin resulta han maanaw an mga kinabuhi hin upat nga mangirisda ha magkalainlain nga insidente ha kadagatan samtang maraot an panahon durante han bisperas ngan mismo adlaw han Pasko.

Ha Southern Leyte, duha nga parupangisda an nagkalulumos han malunod an ira sarakyan pandagat han pagdagmalan ini hin dagko nga mga balud ha kadagatan harani han bungto han Pintuyan. Mga 100 metros nala tikang ha baybayon han Brgy Manglit an sarakyan han mga biktima han matabo an trahedya.

Ginkilala an mga namatay nga hira Row Dialel, 50 anyos; ngan hi Amay Paglinawan, 49 anyos. Natalwas naman an ira mga kaupdanan nga hira Guillermo Habagay, Tomy Deskarten, Garry Deskarten, Romeo Abalida, Ariel Talido ngan Kenneth Brigoli. Hira in mga taga Jasaan, Misamis Oriental nga magdedeliber la unta hin isda ngadto ha Southern Leyte.

Samtang, dida han Disyembre 25, duha nga patay nga lawas in natad-an ha magka-iba nga baybayon ha Northern Samar.

Natad-an ha bungto han Bobon an patay nga lawas ni Jimmy Adante. Hiya in residente han San Roque, Northern Samar nga tulo na ka adlaw nga waray makabalik tikang magpa-ilawod basi mangisda.

Usa pa nga parupangisda nga patay na an natad-an liwat ha San Jose, N. Samar. Hiya in ginkilala nga hi Pablo Cerbito han Laoang, N. Samar.

Samtang ginsusurat ini nga notisya, nawawara pa in tulo nga parupangisda ha Northern Samar, duha ha Dolores ngan duha ha Quinapondan, Eastern Samar. #