Isumat.com/Disyembre 25, 2022
Gindagmalan hin magkalainlain nga trahedya an pira nga parte han Rehiyon Otso ha bisperas han Pasko. Ini in ginlalakipan hin mga pagbabaha, missing persons, namatay nga lalaki, ngan sunog.
Didto ha Eastern Samar, kadam-an nga bungto in nag-antos hin baha tungod han duha ka adlaw nga waray wantas nga bubunok. Grabe nga naigo han baha an pira nga parte han Llorente ngan Balangkayan kun diin may mga residente nga nag-evacuate ngan gin-rescue tikang han ira kabablayan nga ginlunupan han tubig.
Samtang, didto naman ha Catbalogan City, Samar, usa naman nga bodega ha Purok 2, Brgy Ginsurungan an nasunog. Samtang ginsusurat ini nga notisya, padayon pa an pag-imbestigar han Bureau of Fire Protection kun ano an hinungdan han insidente.
Ha Northern Samar, iginreport nga nagkakawawara an mga parupangisda nga hira Roy Tosing, 40 anyos ngan hi Jonathan Ponce, 37 anyos. Hira in mga residente han Brgy Talalora, bungto han Palapag. Tobtob han bisperas han Pasko, waray pa bumalik hira tikang han pagpa-ilawod hadton Disyembre 22.
Ha luyo nga bahin, hira Jimmy Adante, 47 anyos, ngan Felipe Esmerio nga mga taga Laoangan, San Roque, N. Samar in nawawara gihapon kataliwan nga mangisda ngan waray pa makakabalik.
Hi Reinold Muncada han Brgy Cahayagan, Laoang, N. Samar an iginreport liwat nga nawawara tikang han paglakat ha ira panimalay basi managat.
Didto naman ha Brgy Hamorawon, Guiuan, E. Samar, 12 nga kabablayan ngan upat nga motorboats an nagkaada hin distroso han pagbayuhon hin buhawi pasado alas 7 han aga han Disyembre 24. Waray nahireport nga casualty dida hini nga panhitabo.
Kadam-an gihapon nga biyahedor ngan behikulo an na-stranded ngan nadelatar an pagbiyahe tungod han mga baha ha Taft ngan Llorente ha Eastern Samar. Ginbaha gihapon an pira nga parte han mga bungto han Jipapad, Oras, Arteche, Guiuan, Gen Macarthur, Hernani, Maydolong ,San Julian, Sulat ngan Quinapondan.
Ha Liloan, Southern Leyte, waray na kinabuhi hi Nerie Montajes, parag-uma ngan residente han Brgy Amaga, han matad-an han iya paryente dida han aga han bisperas han Pasko. Sumala han mga kapimilya han biktima, para-inom hi Montajes ngan nagpirit paggawas ha ira balay bisan kun hubog na.
Paghagos hin pira ka oras, natad-an nga nahuyang na hiya ha ligid han barangay road. Nag-iimbestigar pa an mga otoridad hini nga insidente. (Photos courtesy to the owners)
