Isumat.com/4:30PM, August 11, 2020
Dida han 47 nga bag-o nga natapnan han COVID-19 kakulop (Agopsto 10), pira ha ira in mga nagbabantay hin mga pasyente ha hospital ug an iba naman in na-admit ha hospital ngan pag gawas han resulta han swab testing, positibo na hira han virus.
Amo ini an natabo han duha nga kababayen-an nga nagbabantay han COVID Patient nga taga Villareal, Samar. Ini nga babaye usa nga In-Patient ha Divine Word Hospital (DWH) nga gin-refer ha EVRMC ug close contacts niya an duha nga bag-o nga natapnan. Matatawag ba ini nga Local Transmission o may nakatapon didto han hospital?
Iginreport gihapon kakulop an bag-o nga natapnan nga taga Calbayog. Hiya in 47-anyos nga babaye nga nagbibinalik-balik pagpa check-up hin pribado nga hospital ha Tacloban dara han iya maiha na nga sakit. Hadton Agosto 6, ginkuhaan hiya hin swab sample didto han nasabi nga hospital ngan positibo an resulta nga gumawas kakulop. Kun aton manunumduman, mayda liwat 14-anyos nga babaye nga taga Calbayog nga nagpositibo han kagaw ngan namatay hadton Agosto 3 ha EVRMC. Mayda liwat niya iba nga sakit labot la han impeksyon han corona virus. An paki-ana yana, diin man katapni ini ngaduha nga Calbayognon, didto ba ha ira syudad o didto han mga hospital kun diin hira na-admit?
Alagid-agid liwat hini an natabo han senior citizen nga taga Giporlos, Eastern Samar. Waray hiya travel history pero balik balik hiya pagpa dialysis ha Divine Word Hospital ngan dida han Agosto 5, nanluya an iya lawas ngan gindara ha DWH ngan ginkuhaan hin swab sample. Kakulop gumawas an resulta ngan positibo hiya han Covid. Ha Giporlos ba hiya natapnan o ha hospital?
Waray gihapon travel history an gisasyahani nga kaso han Covid ha San Julian, E. Samar. Ini nga babaye in may sakit nga diabetes. Nagsinuka hiya hadton Agosto 2 ngan gin-admit ha Borongan Doctors Hospital ngan gin-refer ha DWH hadton Agosto 5 para han dialysis. Ginkuhaan hiya hin swab sample hadto nga adlaw ha DWH ngan positibo an resulta nga gumawas kakulop. Diin man katapni ini nga babaye…ha San Julian ba, ha Borongan Doctors Hospital o ha DWH?
An tulo nga bag-o nga kaso ha Tacloban nga kakulop gihapon gumawas an resulta in mga local residents ngan didto hira ginkuhaan hin swab sample ha DWH. Diin man liwat hira katapni…ha Tacloban ba o didto ha hospital…o diin nga lugar?
Tulo na ka adlaw an nakalabay, mayda gihapon taga Tarangnan nga nagpositiibo han virus. Tikang pa han Hunyo, naka-confine na hiya ha EVRMC, pero dida la han Agosto 8 hiya nagpositibo. Ha EVRMC ba hiya nakapurot han kagaw?
Mayda liwat taga Guiuan, E Samar nga nahireport nga nagpositibo hadton Agosto 9. Hiya in nagbabantay han iya lola nga pasyente ha EVRMC. Hiya lugod an natapnan han COVID, samtang an iya lola negatibo an resulta. Hin-o man liwat an nakatapon ha iya kay negatibo man an iya lola ngan pira na ka semana hiya ha hospital nga nagbabantay?
Naglulupad-lupad ba an virus ha mga hospital? Mayda ba mga personales han hospital nga positibo pero deri hira maaram?
Peligroso ini nga kahimtang kay kun mayda natatabo nga infection ha hospital, mayda man liwat natatabo nga mga local transmission ha gawas han hospital sugad ha Basey, Samar ngan Palo, Leyte. Kun amo ini an sitwasyon, harayo pa ba o namamangpangan na an paglarab han kagaw ha magkalainlain nga parte han Sinirangan Bisayas?
