Haros ngatanan han nababatasanan nga aktibidadis han tawo in humogpoy hapagkayana dara han krisis durot han COVID-19. Pakabuhi, ekonomiya, transportasyon, pagli-aw libang ug paugnat ha kusog. Ngani, bisan an gidadaku-i nga sporting event han kalibutan nga amo an Olympics in waray madayon yana nga tuig dara han epekto hini nga makamaratay nga kagaw, ug yinukot-yukot nga mga de-kalibre nga atleta an nabido dara hini nga ka-ubol han Olimpyada ha Tokyo.
Denhi ha Pilipinas, amo gihapon an sitwasyon…nakanselar an Palarong Pambansa ug damo nga mga liga, ngan kakulop la nagdesisyon an nagdudumara han Universities Athletic Association of the Philippines (UAAP) hin pagkanselar han Season 82. An UAAP amo an pinaka prestihiyoso nga collegiate league han nasud. An iba nga events han liga sugad han womens’ volleyball in nagtikang na pero deri na igpapadayon, samtang an iba sugad han track and field nga waray pa magtikang in deri na gihapon madadayon.
Dida hini nga kanselasyon han UAAP Season 82, naningkamot an isumat.com nga igka-istorya in duha nga mga kilalado nga atleta han UAAP nga taga denhi ha Eastern Visayas. Amo ini hira Alina Bicar nga amo an team captain han University of Santo Tomas Lady Tigresses nga kaapi han womens’ volleyball, ug hi Mariano Masano nga miembro han track and field team han University of the Philippines.
Hi Bicar amo in natawo ha San Antonio, Basey, Samar pero denhi na ha Tacloban nag-eskwela han elementarya ngan high school kun diin pira hiya ka beses nga nagmulay ha Palarong Pambansa antis hiya kuhaon han UST. Sumala kan Alina, haros deri pa hiya nakakatood nga deri na madadayon an UAAP yana nga tuig ngan yana pala hinay-hinay niya nga nakakarawat an kamatooran nga nawarayan hiya hin oportunidad nga igpakita an ngatanan nga iya abilidad.
Para han setter, dako an iya kabido-an kay graduating student na hiya ngan amo ini an katapusan nga torneo nga iya mumulayan ha UAAP. Ikalima ngan katapusan niya nga season yana ha UAAP ngan nagin duro ini ka mabug-at ha iya nga kanselado an torneo kay hiya pa gud an natudlok nga team captain antis magtikang an murumlay.
Han nag-agi nga upat ka tuig niya ha UST, deri gud hilawig an playing time ni Bicar kun igtatanding han iya mas kilalado nga mga team mates. Pero dida han Season 81, humitaas an kumpiyansa ni Coach Kung Fu Reyes ha iya dara han malaum-laum nga iya performance dida han semifinals kun diin ira gintumba an llamado nga De La Salle University, ug dida han kampeonato kun diiin umato hira hin mahugot kontra han nag kampeon nga Ateneo.
Yana unta nga Season 82 amo an gidadaku-i nga tsansa para han pagpasundayag han iya talento labi na nga matatapos na hiya pag-eskwela. Sering pa ni Alina, duro an ira paniguro nga makabawi yana nga tuig ngan pumakadto pa hira ha Taiwan para han ira training ha paglaum nga makakabalik hira ha finals ngan makadaug han korona pero ini in nakawang la dara han COVID-19. Antis kanselaron an Season 82, an team ni Bicar in nagkakapot hin record nga usa nga daog ngan usa an perde.
Iya iginsumat nga naningkamot hiya pagmala-uli han masuspender an murumlay, pero waray na hiya makapalit hin plane ticket dara han duro hin kadamo nga nagpapasig-unahay nga makapalit ngan yana nagpabilin pag-ukoy han iya dormitoryo ha Manila, harayo ha iya pamilya nga aanhi ha Tacloban.
Kun waray maka-uli hi Alina, nakahimo naman igka-urusa han iya kag-anak ngan kabugtu-an ha Mayorga, Leyte an middle distance runner nga hi Mar Masano. Nagsering hi Masano nga ginkulba hiya han sitwasyon ha Manila sanglit nagmalahimo gud hiya nga makauli ngan nakasakay hiya usa ka adlaw antis igpatuman an lockdown.
Hi Masano in second year Physical Education student ha UP ngan an iya events amo an 800 ngan 1500 meters nga paprumba. Han nag-agi nga tuig, silver medals an iya nakuha dida hini nga mga oyag, ngan yana unta nga Season 82 hiya an ginpapaboran han mga eksperto nga makaka-angkon han gold medal dida han 1500 meters.
Ini in dara han dako nga iya international exposure sugad han Vietnam International Open kun diin nakadaog hiya hin silver, ug dida han South East Asian Games nga silver gihapon an iya nadag-an. Sering pa man ni Masano, dako gud an iya paglaum nga panahon na para han gold ha UAAP, pero naanaw la ini dara han COVID-19.
Hi Masano in anay atleta han Leyte Sports Academy ngan pira ka beses gihapon nga nag representar han Region 8 ha Palarong Pambansa. Nakadaog gihapon hiya hin mga medalya ha NCAA samtang na-eskwela han iya senior high ha San Beda College.
Hira Bicar ngan Masano in duha la han minilyon-milyon nga mga atleta ha kalibutan nga haros dugo ngan balhas an puhunan basi la maakaghatag hin onor ha ira nasud ngan eskwelahan ug an sugad hini nga krisis in alagid-agid hin matarom nga butang nga nakatusok han ira kasing-kasing. Pero maano pa man an panhitabo, ira ginkakarawat an sitwasyon ngan padayon an paglaum nga maabot an adlaw para utro mahipasundayag nira an kamakarit ha sports. #
(Posted 3:17 PM, April 9, 2020)
