Isumat.com/3:32AM, August 23, 2020
Padayon nga gindadagmalan han Covid-19 an syudad han Catbalogan. May nahipatik nga 80 nga kaso didto han lugar kakulop (Agosto 22) subay han report han DOH Regional Office.
Nagpahayag an LGU nga kasagaran han bag-o nga mga kaso in mga Health Workers, mga nagtatrabaho ha City Hall ngan Frontliners. Hapagkayana, lapos na hin 200 an Active Cases didto han syudad.
An Catbalogan in iginbalik ha Enhanced Community Quarantine, an gihahataasi nga klase hin kwarentina. Ha ilarum hini, igindederi an mga katitirok, upod na an pagdumara hin relihiyoso nga mga aktibidadis ug na-alakbatan hini an ira pagsa-urog han pista ni San Bartolome buwas, Agosto 24.
Mahugot gihapon nga igpapatuman an liquor ban, ngan deri puede an bisan ano nga klase hin ehersisyo ha gawas han balay, sugad man an 24-oras nga curfew. An makakagawas la an katawhan nga mapalit han panguna nga panginahanglan sugad man emergency nga sitwasyon. Lakip han nagkatatapnan an alkalde mismo han syudad ngahi Mayor Dexter Uy.
Ini nga mga bag-o nga kaso ha Catbalogan in upod dida han 132 nga bag-o nga kaso ha bug-os nga rehiyon. Ini an ikaduha ka adlaw nga sobra hin 100 an natapnan kay dida han Biernes, 135 an nagpositibo han kagaw.
Ha Tacloban City, 16 an bag-o nga kaso; samtang mayda naman walo ha Palo, Leyte. Hira in mga Health Workers ug mga local residents nga nagkatatapnan han naha-una nga nagpositibo.
Tulo naman nga kaso an nahi-record ha Biliran; samtang an lima nga kaso ha Ormoc in mga Locally Stranded Individuals.
Ngatanan tikang ha Cebu an lima nga natapnan ha Marabut, samtang local transmmission an rason han tulo nga natapnan ha Paranas. Waray gihapon travel history an tag-usa nga bag-o nga kaso han Calbiga ngan Daram.
2,184 na an nagpositibo han virus ngan 1,333 (61%) an naka-recover ha Eastern Visayas. An Active Cases hapagkayana in 839. #
