Isumat.com/7:59AM, Pebrero 27, 2021

Nasikmit han mga otoridad in usa nga kagawad ha Catarman, swimming instructor ha Tacloban ngan construction foreman ha Biliran dida hin magkalainlain nga operasyon kontra han iligal nga droga.

Hi Julito Bocboc, kagawad han Brgy Cag-abaca ha Catarman, Northern Samar in na-aresto dida han operasyon han PDEA-Region 8 didto mismo han iya barangay. An mga otoridad in nakakumpiskar hin unom ka sachet hin gin-aalegar nga shabu tikang han suspetsado balor hin 1,800 pesos.

Samtang, an construction foreman ginkilala nga hi Ruben Asentista, 34-anyos in nadakop dida han buy-bust ha Caibiran Biliran hadin Pebrero 25. Nakasagap hin impormasyon an mga tinubyanan han balaud nga nagbabaligya hin droga hi Asentista ngadto han mga nagtatrabaho nga iya kaupod labi na an mga trabahador ha night shift.

An suspetsado in taga Zamboanga, pero nadestino didto ha Caibiran tungod kay an iya kompaniya nga gintatrabaho-an amo an contractor paghimo hin tulay didto han mao nga lugar.

Narekupo tikang ha iya in 11 ka sachet han iligal nga droga kantidad hin porlomenos 11 Mil pesos.

Ha Tacloban City, na-aresto an suspetsado nga hi Celedonio Rubillos Yu ha buy-bust nga ginhimo han kapulisan ha Real St han syudad. Sumala han impormasyon, an suspetsado in 51-anyos, residente ha Gomez St ngan usa nga swimming istructor.

Narekupo tikang kan Yu in 10 ka sachet hin gintotoohan shabu balor hin 31 Mil pesos.

An nasabi nga tulo nga mga suspetsado in nakapaslak na ha karsel ngan nakatalaan pag-atubang hin mga kaso ha korte. #