Hi Tacloban PNP Chief Col Miranda samtang nakikighimangraw han tagdumara han VDVC.

Isumat.com/7:32AM, Pebrero 27, 2021

An bug-os nga pwersa han kapulisan ha Tacloban City in tim-os an suporta ha paningkamot nga mapoypoy an iligal nga pagpahuygo dida han nasabi nga syudad.

Ini an gintagan hin duon ni PCol Darwin Miranda dida han iya pakighimangraw han nagdudumara han Victoria Development and Ventures Corporation (VDVC) nga amo an nag-uusaan la nga kompaniya nga gintagan hin otorisasyon han PCSO nga magkapot han Small Town Lottery (STL) ha Tacloban, Leyte ngan Biliran.

Hi Miranda upod kan CMFC Commander Lt Col. Richie Salem in pumasyada ngadto han opisina han VDVC basi hisgutan an nasabi nga isyu. Iginpahayag han opisyal nga an iligal nga pagpahuygo labi na an illegal numbers game amo an tututukan han ira mga operatiba.

Antis pa hini, iginpahinumdom han VDVC ngadto ha publiko labi na an manaraya han numbers game nga didto gud la hira tumaya o pumusta han mga otorisado nga sales agents han VDVC. Gin-esplikar han kompaniya nga an STL-Pares, STL-Swer2, ngan STL Swer3 amo la an legal nga ginmumulay.

Kun mayda nagpapataya nga mga agent han swertres o peryahan ng bayan, ini in supak ha balaud ngan hin-o man nga nagpapataya o napusta in dadakpon han mga otoridad.

Nananawagan gihapon an VDVC ug an PCSO ha katawhan nga igreport ha mga otoridad an iligal nga pagpataya basi magkadadakop ngan makasuhan an nadadabi han iligal nga mga aktibidadis. #