Isumat.com/8:23AM, Pebrero 27, 2021
Nahingadto ha kabido-an an pagpahalibway hin usa nga barangay tanod han malumos hiya samtang nakarigos ha usa nga baybayon ha probinsya han Biliran hadin nakalabay nga adlaw.
Subay han record han imbestigasyon, ginkilala an biktima nga hi Joshua Dimpal, 32-anyos, residente ngan tanod ha Brgy Inasuyan, Kawayan Biliran. An grupo ni Dimpal in pumakadto ha usa nga resort ha Talahid ha bungto han Almeria basi mangarigos.
Nagsumat an mga kaupdanan han biktima nga an tanod in segi an langoy-langoy ha kadagatan han urhi nira nga pakasipat hini, Paghagos hin pira ka oras, natad-an nga nalutaw an iya lawas ha sapit nga kadagatan han resort. kadagmitan gindara ha hospital hi Dimpal pero gindeklarar han doktor nga dead on arrival.
Samtang ha iba nga pahitabo, naugbaw an walo nga kabablayan dida han sunog nga natabo kakulop ha Purok 3, Brgy Obrero, Calbayog City. Dida han report han Bureau of Fire Protection, hinimo-an ha light materials an kabablayan, sanglit madagmit nga ginlamon ini han kalayo.
Waray naman nahireport nga nag-antos hin karamtan ha lawas dida han insidente. Padayon pa nga gin-iimbestigar an panhitabo basi matudlok an balor han distroso ug an rason han sunog. #
