Isumat.com/ Disyembre 21, 2022

Katapos hin haros usa ka tuig nga pagmonitor han mga gios han suspetsado, hiya in na-aresto han mga tinubyanan han balaud ha buy-operation alas 7:30 han aga, Disyembre 20, 2022 ha Brgy Anahaway, Palo, Leyte.

Ginkilala an suspetsado nga hi Ronaldo Gaspay alyas Onad, 60 anyos, inasaw-an, nag-uukoy ha Tacloban City ngan gintutudlok nga high value target han mga otoridad.

Nakumpiskar tikang kan Gaspay in pito ka sachet hin gin-aalegar nga shabu, may timbang nga 75 gramos ngan nagkakantidad hin 450 Mil pesos.

An mga operatiba han PDEA Regional Office, Tacloban City Police, Leyte PNP Provincial Office, ngan Palo Municipal PNP Station an nagburublig basi masikmit an gintatahapan.

Dida han pahayag han mga imbestigador, maiha na nira nga ginmamanmanan an mga gios han suspetsado kay nakasagap hira hin mga impormasyon tikang han mga nagkadadakop ha mga buy-bust nga tikang kan Gaspay an ira ginbabaligya nga droga.

Hinsabutan pa nga an suspetsado in napreso na hadto pero nakagawas ha karsel tungod han plea bargaining, pero bumalik ha iligal nga aktibidad.

An suspetsado in nakatalaan sampaan han kaangayan nga mga kaso, ngan yana aada ha kustudiya han PDEA.#