Isumat.com/10:05AM, June 15, 2020
Usa nga sitio an igin-lockdown ngan iginbalik ha General Community Quarantine (GCQ) an bug-os nga bungto han Hilongos, Leyte. Ini an nahipatik dida han Executive Order No. 18 nga iginpagawas ni Mayor Albert Villahermosa.
Ini an nagin pitad han LGU kasumpay han pagdeklarar han Department of Health nga may local transmission han COVID-19 dida han bungto. Duha na ka tawo an nagpositibo han virus ha Hilongos, pero an ikaduha in waray travel history sanglit an DOH in nagkumpirmar nga natabo na an local transmission.
Ha ilarum han Executive Order, tikang ha MGCQ igbabalik an GCQ dida han munisipalidad, samtang an Sitio Kalachuchi ha Brgy Western Poblacion an ginpailarum ha total lockdown. An ngatanan nga residente dida han sitio in deri makakagawas ha ira balay samtang deri pa tapos an contact tracing ug an LGU an maghahatag han pagkaon ngan iba pa nga panginahanglan han mga mulopyo.
Dida han contact tracing para han mga posible iginka-urusa han pasyente, natudlok na in sobra 20 ka tawo nga ginlalakipan han pamilya, ug mga personales han hospital nga nagtimangno ngan nagdukl-ong ha iya ha EVRMC-Magsaysay kun diin naka-confine yana hiya. Ini nga mga tawo in igpapailarum hin swab testing ngan ginhuhulat an resulta.
Ha bungto naman han Dagami kun diin may 11 nga Positive Cases, nanginyupo an Rural Health Unit para han mga Dagamin-on nga na-stranded ha iba nga lugar nga kun mahihimo deri la anay bumalik ngadto han bungto.Kun nakapalit na hin ticket ha eroplano, nahangyo an RHU kun puede ig-reschedule an byahe.
Nag-esplikar an ahensya nga limitado an Holding Facility han LGU ug deri bastante an kadamo han mga health personnel nga magtitimangno han mga naka-kwarentina. Hira gihapon in natutok yana han contact tracing. Deri akos han RHU nga magdurungan pag-uli in kadam-an nga residente ngan bangin lugod may matapnan nga health worker sugad han natabo ha iba nga bungto.
Kadungan hini, nanawagan an RHU ha mga bungtuhanon nga deri gumawas ha ira panimalay kun deri gud kinahanglan ngan sundon an mga patakaran kasumpay han paglikay han virus.
Aminado an RHU nga kun madugangan pa an magpopositibo ha ira nasasakupan, duro hin kamakuri an contact tracing kay an Dagami in ginkokomponer hin 65 nga barangay ngan haros 39 Mil nga popolasyon. #
