Isumat.com/3:09PM, August 10, 2020
Nagin sentro yana han pagtutok han Tacloban PNP Drug Enforcement Unit (CDEU) an personalidad nga an ngaran hi Jonard Tanega ug an nagbabalik-balik nga paglutaw hini nga ngaran in panigamnan nga duro hin kamakuri an kampanya basi mapoypoy an iligal nga droga.
Sumala han pahayag han CDEU, an ngaran ni Jonard Tanega in pira na ka beses nga nabutho dida han ira mga gindudumara nga panakop han mga nagbabaligya han iligal nga droga. Dida han Agosto 7, an mga kapulisan in naka-aresto hin suspetsado nga drug pusher dida hin buy-bust operation ha Brgy 39, Tacloban.
Dida han interogasyon, an suspetsado in nagsaysay nga mayda “JONARD” nga nagpapaluyo han aktibidad ngan ini nga tawo in nakapaslak ha karsel. Sumala pa han suspetsado, hi Jonard in mayda ginsusugo nga tawo basi igduhol an droga ngan iya na ini igbabaligya.
Kun magmalinangpuson an transaksyon, hi Jonard in naghahatag hin “komisyon” ngadto han pusher.
Nagsumat pa an CDEU nga an mga transaksyon ni Jonard in pinaagi ha telepono, subay na gihapon han mga testemonya han mga nagkakadadakop. Ini nga impormasyon in deri la dida hini nga insidente kundi gumawas gihapon an ngaran ni Jonard tikang hin damo pa nga drug suspects nga na-aresto han naglabay nga mga panahon.
Ha panginano han mga otoridad, an gintutudlok nga Jonard Tanega in maiha na nga preso kay tikang pa hadton 2004 nakadetener na hiya ha karsel. Hadto nga panahon, waray pa ngani iglunsad an gyera kontra droga.
Tungod hini, aminado an mga otoridad nga nagtitikakuri la ini nga drug war kay ano pa man nga paagi nga magbabaton ha balaud hi Jonard kay preso naman hiya.
Kasumpay hini, nanawagan an kapulisan nga an ngatanan in angay maghinulsol ngan makasantop nga an pakigsurapo kontra han droga in deri la masesentro han Internal Cleansing ha PNP kundi pati na gihapon ha iba nga ahensya han gobyerno.
Sering pa han CDEU, an pakigbisog kontra han iligal nga droga in deri la obligasyon han kapulisan kundi lakip na an iba nga buhatan han gobyerno ug an katawhan. Deri magmamalinagpuson ini nga kampanya kun deri magbuburublig an ngatanan nga sektor han komunidad, pahayag pa han grupo. #
