Isumat.com/2:01PM, August 6, 2020
Nadakop an Most Wanted Person ha usa nga bungto, samtang usa naman nga tricycle driver an pinusil ngan namatay ha sulod mismo han iya balay dida hin magkalain nga insidente.
Ha Caibiran, Biliran, nadakop han mga otoridad an Most Wanted Person dida han nasabi nga lugar. Ginkilala an na-aresto nga hi Danilo Delda, 24-anyos, nga residente han Brgy Maurang han Caibiran.
Gindakop hiya tungod han ginpalusad nga Warrant of Arrest dara han mga kaso nga Murder ngan Frustrated Murder. An akusado in nakapaslak na yana ha Caibiran Police Station.
Samtang didto naman ha Gandara, Samar, an tricycle driver nga hi Glen Reyes in pinusil ngan pinatay ha sulod mismo han iya balay ha Brgy Adela Heights.
Sumala han report han Gandara PNP, an 27-anyos nga biktima in nakig-inom anay ha iya mga kasangkayan hadton Agosto 4 ngan natapos an ira tagaytagay han tabis na an kagab-ihon.
Katapos han irignom, umuli hi Reyes ha ira balay. Temprano pa han aga kinabuwasan, nadiskubre nga nakarigos na hin dugo an biktima ngan waray na kinabuhi. Nag-antos hiya hin mga igo hin bala ha ulo ngan lawas.
Ha inisyal nga imbestigasyon, posible nga ginsulod han waray kakilal-i nga suspetsado an biktima ngadto han balay ngan pinusil ini samtang nakaturog. Waray pa hisabti kun ano nga klase hin pusil an gingamit dida han krimen.
Waray record ha barangay ngan PNP nga mayda iginka-away an biktima. Padayon pa yana nga nagdudumara hin pagsusi an mga imbestigador han Gandara PNP kasumpay hini nga panhitabo. #
