Isumat.com/8:09AM, July 10, 2020
An mga kabubkiran nga nasasakop han mga bungto han Motiong, Paranas ngan San Jose de Buan ha probinsya han Samar an ginpupugaran han mga rebelde nga New Peoples’ Army. Ini an iginbuyagyag ni MajGeneral Pio Dinoso III, Commanding General han 8th Infantry Division han Philippine Army.
Ini nga mga bungto nga namumutang ha sentro han isla han Samar an ginhihimo yana nga teritoryo han mga rebelde tungod kay damo ngan masighot an kabubkiran ngan puede lumusad ha national highway basi mag-ambush, sering ni Dinoso.
Tungod hini, nanlilimbasog an militar nga dad-on an mga serbisyo han gobyerno ngadto han mga barangay hini nga mga bungto pinaagi han Community Support Program. Pinaagi hini nga proyekto, ginbubuligan han militar an iba nga ahensya han gobyerno sugad han medical ngan agricultural personnel basi makatagamtam an mga baryuhanon hin kalungganayan.
Iginsumat pa ni Dinoso nga iginsasalikway han mga katawhan didto hini nga mga bungto an mga rebelde tungod han pan-abuso ngan pagtarhog sugad man pagkuha han ira mga produkto ha umhanan. Makalolooy an mga residente ha mga baryo tungod han magraot nga binuhatan han mga kumunista, dugang pa han heneral.
Kasumpay hini, an 8th ID in nagpadara hin kadugangan nga mga batalyon, mga tangke ngan Special Units ngadto hini nga mga lugar basi matagan hin proteksyon an mga bungtuhanon.
Nagsering hi Dinoso nga nakatutok yana an ira pwersa dida han nasabi nga mga lugar tungod kay mamurayaw man an iba nga parte han rehiyon. #
