Isumat.com/9:00AM,July 02, 2020
Nagtitikadamo an mga pasyente ha Region 8 nga nakakatalwas tikang han COVID-19. An DOH Regional Office in nagreport kagab-i (Hulyo 1) nga mayda 99 nga bag-o nga naka-recover han sakit. Dara hini, umabot na ha 321 an recoveries ha Eastern Visayas.
Ini nga recoveries in 58 porsyento han mga nagkatatapnan nga aada na ha 547 katawo. Dida gihapon han report, mayda bag-o nga 15 katawo nga nagpositibo han virus.
An bungto han Silago, Southern Leyte an na-igo han ira syahan nga kaso ngan upat ini katawo. Duha nga lalaki ngan duha nga babaye ini nga mga pasyente. Hira in umabot ha Silago tikang ha Cavite sakay hin pribado nga behikulo hadton Hunyo 16. Tikang hira umabot, deretso ini hira ha LGU Quarantine Unit.
Syahan gihapon nga mga kaso an nahirecord ha San Francisco ngan Pintuyan, Southern Leyte. An taga San Francisco in umuli tikang ha Metro Manila hadton Hunyo 21, samtang an didto ha Pintuyan in 29-anyos nga lalaki tikang ha Cebu. Nadugangan naman hin duha nga kaso an Padre Burgos. An usa in 21-anyos nga lalaki tikang ha Cebu ug an ikaduha in health worker han LGU nga nagtitimangno han Quarantine Unit.
Mayda gihapon bag-o nga kaso an Caibiran, Biliran pinaagi hin 31-anyos nga babaye tikang ha Quezon City. Pag-abot ha Caibiran, ini nga babaye in mayda tulo katawo nga upod ngan ginhuhulat pa an resulta han swab samples. Nagpakyaw hira hin van han ira pagbiyahe.
Ha Carigara, Leyte natapnan han virus an 3-anyos nga bata, ug gintutuohan nga an nakatapon ha iya amo an iya close contact nga health worker nga naha-una na nga nagpositibo han kagaw. An bungto han Julita in may bag-o nga kaso ug ini in tikang ha Cebu. Nahipatik naman an syahan nga kaso ha Villaba, Leyte ug hiya in 22 anyos nga lalaki tikang ha Cebu.
Duha liwat nga Positive Cases an nahidugang ha Calbayog City. Hira in 27-anyos nga lalaki ngan 20-anyos nga babaye nga nakabalik ha Calbayog tikang ha Cebu. An munsipalidad han Motiong, Samar in nagrehistro han ira syahan nga pasyente, hiya in 49-anyos nga lalaki nga umabot ha Motiong hadton Hunyo 25 tikang ha Bohol.
Ha luyo nga bahin, igin-anunsyo naman han LGU-Tarangnan nga tulo nala nga Active Cases han COVID an ginmomonitor ha ira bungto. Tikang han 35 nga natapnan, tulo nala yana an gintatambal han mga health authorities.
Dida han 547 nga nagpositibo ha Sinirangan Bisayas, 324 an kanan Hatid-Probinsya, 48 an OFWs, ngan tulo an Balik-Probinsya. An mga medical personnel nga natapnan in aada na ha 102 pero nagpapabilin nga mahimsog an ira panlawas.
Dida han mga nagpositibo, 93 porsyento an Asymptomatic, 5 porsyento an Mild Cases ngan haros waray umabot ha 1 porsyento an Severe Cases. # (KEVIN SIOSANA)
