Isumat.com/8:15AM,June 29, 2020
21 nga COVID Patients ha Eastern Visayas an naka-recover kakulop nga adlaw (Hunyo 28). Ini in subay han latest update han DOH Regional Office.
Dara hini, umabot na ha 196 an nakatalwas tikang han virus denhi ha Eastern Visayas. Ini nga recoveries in 39 porsyento han mga nagpositibo nga 499 ka tawo. Hapagkayana, mayda 300 nga Active Cases, samtang nagpapabilin nga tulo an namatay.
Dida han mga nagkatatapnan, 294 an mga Locally Stranded Individuals ngan 45 an OFWs. Naabot naman hin 94 nga health workers an nagpositibo han kagaw.
93 porsyento han mga pasyente in Asymptomatic o waray ginpapakita nga sintomas han virus, 5 porsyento an mild cases ngan 1 porsyento la an Severe Cases.
Ha probinsya han Leyte, 90 na an nakatalwas ha 201 nga nagpositibo; didto naman ha Samar, 110 an natapnan ngan 39 an recoveries; 40 an naka-recover dida han 56 nga natapnan ha Ormoc; samtang tulo pala an naka-recover han 55 nga kaso ha Tacloban; ngan ha Southern Leyte 54 an nagpositibo ngan pito an recoveries.
Kakulop, waray iginpagawas nga mga resulta hin swab samples an duha nga COVID Laboratory ha Eastern Visayas. Yana nga adlaw, Hunyo 29, magpapadayon an pag proseso han mga samples an nasabi nga mga laboratoryo. # (KEVIN SIOSANA)
