Isumat.com/4:10AM,June 28, 2020
175 na nga pasyente han COVID-19 ha Eastern Visayas (EV) an nakatalwas tikang han kataragman nga durot han kagaw, ug ini in narepresentar hin 35 porsyento han sumatotal han nagkatatapnan ha bug-os nga rehiyon.
Ini in subay han gibabag-uhi nga report han DOH Regional Office nga nagsusumat nga dida han nag-agi nga adlaw (Hunyo 27), nagkaada hin 43 nga recoveries salit umabot na tanan ha 175 an naka-recover.
Samtang, iginpasamwak naman han DOH kagab-i an kadugangan nga tulo ka tawo nga nagpositibo han virus, sanglit umabot na ha 499 an kumpirmado nga kaso han rehiyon. Ini nga nahidugang in duha tikang ha Hilongos ngan usa an residente ha Baybay City.
Sumala han pahayag han LGU-Hilongos, maupay an kahimtang han duha nga nagpositibo ug waray iginpapakita nga sintomas tikang pa han ira pag-abot han Hunyo 12, 2020. Kukuhaan hira hin bag-o nga swab samples ha paglaum nga magigin negatibo na an resulta kay naglapos naman ngani hira han duha ka semana nga kwarentina. Aadto hira ha Isolation Unit han LGU ngan waray pa hira igka-urusa han ira pamilya tikang han pag-abot ngadto ha Hilongos.
An taga Baybay City naman in 34-anyos nga babaye nga bumalik tikang ha Manila. Maupay gihapon an panlawas ngan naka-akomodar ha Quarantine Facility han syudad.
Nadugangan naman an mga health workers nga natapnan han virus kay didto ha Catbalogan, duha nga nagtatrabaho ha hospital an nag positibo. Hira ngaduha in lakip han walo ka tawo nga taga Catbalogan nga nahireport nga Positive Cases hadton Biernes (Hunyo 26). Ngaduha hira kalalakin-an ngan aada gihapon ha maupay nga kahimtang an panlawas.
Padayon naman an pag-awhag han DOH ngan mga LGUs ha katawhan nga hingpit pagsundon an mga health protocols sugad han insakto nga pagsul-ot han face mask kun magawas ha balay, pag-obserbar han physical distancing, paghunaw hin maupay han kamot ngan deri pagkinapotkapot han nawong. # (KEVIN SIOSANA)
