Isumat.com/5:20PM,June 26, 2020
Makahurulop kun pagkikinata-on la an ihap han natapnan han COVID-19 ha Sinirangan Bisayas. Ini in dara kay umabot na ha 468 an nagpositibo han kagaw ha bug-os nga rehiyon.
Pero kun sisiplatan an record han mga nakatalwas tikang han peligro, nagdudurot ini hin paglaum. Dida han gibabag-uhi nga report han DOH Regional Office, mayda na 132 nga pasyente an naka-recover tikang han infection. Ini in tobtob han Hunyo 25, 2020 nga record han ahensya. Ini nga numero in narepresentar hin 28 porsyento nga recoveries tikang han sumatotal nga Positive Cases.
An Ormoc City an gidadamu-i an naka-recover nga pasyente, kay dida han 55 nga Ormocanon nga nagpositibo, 41 na an nasalbar tikang ha kadelikaduhan. Ha probinsya han Leyte, 37 na an nakatalwas dida han 195 nga natapnan.
Didto naman ha lalawigan han Samar, 35 na an nakalibre han corona virus tikang han 93 nga Positive Cases. Ha Southern Leyte, mayda 48 nga natapnan ngan 6 an recoveries, samtang unom gihapon an recoveries tikang han 12 nga pasyente ha Northern Samar.
Ha syudad han Tacloban kun diin 54 na an na-igo han virus, tulo pala an naka-recover.
Ha kabug-usan, 94 nga medical personnel an nadarahigan han virus, ngan kadam-an ha ira in residente han Tacloban ngan nagtatrabaho ha EVRMC.
Dida gihapon han report, nagpapakita nga 231 an natapnan nga Locally Stranded Individuals (LSI) samtang an iba in Community Transmission, OFWs, ngan Balik Probinsya nga mga beneficiario.
93 porsyento han mga natapnan in asymptomatic o waray iginpapakita nga sintomas han virus ngan mahimsog an panlawas; 6 porsyento an mild cases; ngan 1 porsyento la an severe o nagin grabe an kahimtang. Ha bug-os nga rehiyon, tulo an namatay nga may kalabutan an COVID-19. Duha ha ira in sobra 60 anyos an edad, samtang an usa 47 anyos. Ini nga tulo nga namatay in mayda na daan nga gin-aantos nga mga sakit antis pa matapnan han corona virus.
Dida han mga nagkatatapnan, nangunguna an age bracket nga 20-29 anyos kun diin 174 an nag positibo; 81 naman an pasyente ha bracket nga 30-39 anyos; samtang 50 an nag positibo ha bracket nga 50-59 anyos.
An Eastern Visayas Regional Testing Center in nagproseso na hin 6291 swab samples kun diin 420 an nag positibo, samtang an iba nga resulta in tikang ha Divine Word Hospital Laboratory.
Iginpahayag han DOH Central Office nga may posibilidad nga magin “hot spots” han virus an Leyte, Samar, Southern Leyte ngan Ormoc City kun deri kababalabgan an pagtikadamo han Positive Cases. Pero ginlalauman nga deri na magbubunal hin kadam-an nga infection han kagaw tungod han pagsuspender han pagkabalik han mga LSI nganhi ha Region 8 tikang yana nga adlaw tobtob Hulyo 9, 2020. # (KEVIN SIOSANA/Isumat.com Analytics)
