Isumat.com/9:12AM, June 12, 2020
Para han mga batan-on nga may bokasyon o karuyag hin pakabuhi ha agrikultura, aadi na an oportunidad para ha iyo.
An Department of Agriculture in nagmugna han programa tinatawag nga KAYA (Kapital Access for Young Agriprineurs). Ini in para han mga mulopyo nga intresado hin pakabuhi ha agrikultura nga nag-eedad tikang 18 tobtob 30 anyos.
Kakulop, an Agricultural Credit Policy Council, usa nga attached agency han DA, in nakighimangraw han mga tinaglawas han Land Bank, mga rural banks, State Colleges and Universities ug an DA-Region 8. Ira gin-istoryahan an mga paagi ngan proseso hini nga programa.
An meeting in nagsentro han pamaagi basi maka-agom hin pa-utang an batan-on nga karuyag mamuhunan ha agrikultura, lakip na an mga papeles nga kinahanglan ug mga rekisitos basi magin kwalipikado an mga intresado han proyekto.
Subay han impormasyon tikang ha DA, an kwalipkado nga agripreneur in makakahuram tobtob 500,000 pesos komo kapital. Nagpahayag pa an ahensya nga waray interest an pagbayad han mao nga utang. Pero ginklaro han buhatan nga maagi pa hin hingpit nga proseso an pag-aprobar han aplikasyon basi maseguro nga magigin mabinungahon an proyekto.
Kasumpay hini, gin-aaghat han ahensya an mga intresado nga makigsumpayan han mga bangko nga ira kasugbong hini nga programa o makigkoordinar ha DA pinaagi han masunod nga contact numbers: 09396012988; 09063745063 ngan 09063745065. # (With Report from Francis Rosaroso- DA Region 8)
