Isumat.com/8:19AM, May 11, 2020
“Aanhin pa ang damo kung patay na ang kabayo.” Ini an usa han mga bantuganan nga darahunon denhi ha aton nasud
Sugadsugad nga amo ini an puede naton matudlok nga sitwasyon han 66-anyos nga lalaki nga nagpakamatay didto ha Kawayan, Biliran upat na ka adlaw an nakalabay. Kun aton manunumduman, an biktima nga hi Diosdado Tancinco han Brgy Tucdao in nag-aantos hin sakit ha kidney ngan kinahanglan magpa hemodialysis.
Dida han iya pagpa check-up ha usa nga hospital ha Ormoc City han nag-agi nga semana iginpailarum hiya han Rapid Anti-Body Test ngan positibo an nagin resulta. Subay han inisyal nga imbestigasyon han Kawayan PNP, nagdurot ini hin grabe nga depression ug kawaray paglaum para han biktima. Labot la nga mayda niya sakit ha kidney ngan dako an kantidad nga kinahanglan para han pagpatambal, nag positibo pa gud hiya ha Rapid Test.
Ini an ginkikitakita nga anggulo han mga imbestigador nga rason han iya pagkamatay pinaagi hin pagpusil han iya kalugaringon gamit in pistola. Antis niya utdon an iya kinabuhi, ginkuhaan hiya hin swab sample ngan iginpadara ha Cebu para han confirmatory test.
Kakulop, mayda resulta hin 36 nga samples nga nakarawat an DOH-Region 8 ug tanan ini negatibo ha COVID-19. Usa hini amo an tikang kan Tancinco. Negatibo hiya ha corona virus.
An resulta han confirmatory test in umabot hin walo ka adlaw tikang hiya kuhaan hin swab sample. Puede ini masering nga dako an epekto ha panhunahuna han tawo an Rapid Testing ug an maiha nga paghinulat han resulta han confirmatory test. Bisan pa man kun negatibo hiya ha corona virus, deri na mahibabalik an iya kinabuhi.
Yana nga mayda na kalugaringon nga Molecular Laboratory an EVRMC, dako an mabubulig hini ha panhunahuna nga aspeto han mga Suspected Cases nga nag-aantos hin “mental torture” samtang nagpapamulat han resulta.# (KEVIN SIOSANA)
