(File photo by update.ph)

Isumat.com/Disyembre 13, 2022

Napi-angan na liwat an pwersa han rebelde nga mga kumunista ha Eastern Visayas han magsurender in walo han ira kaapi didto ha Northern Samar hadin Disyembre 8, 2022.

Ha report han 803rd Infantry Battalion han Philippine Army nga nakabase ha Catarman, N. Samar, an mga nagsurender in miembro han Front Command 2 Sub-Regional Committee Emporium ngan White Area Committee-Northern Samar.

Igintubyan gihapon han mga rebelde ha mga tropa han gobyerno an ira mga armas nga ginlalakipan hin 5.56 M16 rifle, 5.56 M653 rifle, kalibre .45 nga pistola, tulo nga kalibre .38 nga pistola ngan duha nga rifle grenades.

An mga rebelde in sumurender ngadto han 43rd Infantry Battalion ha Lope de Vega, Northern Samar.

Iginsumat han mga nagsurender nga dako hin duro an ira sakripisyo ha kagi-usan kumunista ngan deri na nira nasusuportaran an ira tagsatagsa nga pamilya kay kulang na hin ura-ura an ayuda tikang ha mga sibilyan.

Diskuntento na hira kay makuri hin duro an ira kahimtang ha kabubkiran, pahayag pa han mga anay rebelde.

An militar in nagpapadayon an panawagan para han iba pa nga mga rebelde nga bumalik na ha piyod han balaud ngan makatagamtam han mga benipisyo nga makakabulig para han normal ngan mamurayaw nga kinabuhi.

An Philippine Army in naniningkamot nga humugpoy na an problema han insureksyon ha Rehiyon Otso sunod nga tuig, subay han pahayag ni 8th Infantry Division Commander MGen Camilo Ligayo hadton Disyembre 11, 2022 dungan han pag-abot hin usa ka batalyon hin scout rangers basi pakusgon pa an pwersa han gobyerno kontra han NPA labi na gud ha Northern Samar. #