Isumat.com/ Marso 21, 2023
Kapresuhan ngan multa nga salapi an sirot nga iginpalusad han korte ngadto hin usa nga Overseas Filipino Worker (OFW) nga nagpakaraot pinaagi han iya mga post ha social media kan anay Ormoc City Mayor ngan yana Leyte Congressman Richard Gomez.
Hi Ormoc Regional Trial Court Judge Maria Corazon Naraja in nagpatok hin kapresuhan tikang 6 ka bulan tobtob 5 ka tuig ha OFW nga hi Julius Tahanlangit tungod han iya malisyoso nga pahayag ha facebook kontra kan Gomez ha iya alegasyon nga maluya ngan kulang hin kinasingkasing nga pagbulig ha iya hadton Mayo 2020, duha ka bulan katapos igdeklarar an pandemic han Covid-19.
Ha notisya han Philippine Star, labot la han kapresuhan, minanduan gihapon han hukmanan hi Tahanlangit nga magbayad hin 300 Mil pesos nga moral damages.
Ginpakaraot han akusado hi Gomez dida han iya facebook post hadton mayo 25, 2020 kay waray daw hiya sundo-a dayon han umabot hiya ha Tacloban City Airport. Iya pa iginpahayag nga an Ormoc City amo la an LGU nga deri nakuha han nagkakabalik nga OFWs.
An OFW in nagpahayag pa ha social media nga alagid-agid nga naghihimo la hi Gomez hin salida ha telebisyon nga puede mag-utod han eksena kun may problema.
Nagpasumbingay pa hiya nga kulang hin kapasidad an alkalde han iya pagdumara han isyu han Covid dida hin kadugangan ga mga posts ha facebook. Iya iginrason nga ginhimo niya an mao nga mga posts basi makuha an atensyon han Ormoc LGU.
Dida han desisyon han korte nga iginpagawas hadton Marso 17, 2023, hinsabutan nga aminado hi Tahanlangit nga ginsundo ngay-an hiya han LGU-Ormoc kinabuwasan, ngan temporaryo hiya nag-ukoy hin usa nga hotel ha Tacloban sugad man pagkaon nga ginbaydan han OWWA.
Nagsering hi Judge Naraja, waray problema han syahan nga duha nga posts han OFW kay ini in iya katungod nga Freedom of expression nga gingagarantiyahan han konstitusyon.
Pero igindig-on han huwes nga an kadugangan nga mga komentaryo ha facebook ni Tahanlangit amo in nagmemenos na han kapasidad ngan balor han pagkatawo ngan posisyon ni Gomez. Sering pa han korte, malisya na an nakagduso han OFW han iya pagbi-ay bi-ay kan Gomez.
An akusado in waray gihapon makagpakita hin ebidensya nga nagmalahimo hiya pagkontak han LGU basi masabtan kun ano an rason han kadelatar han behikulo nga masundo ha iya, lugod deretso hiya nag post ha facebook.
Tobtob han ginsusurat ini nga balita, waray pa nahikay nga reaksyon an IsumatNews tikang han kampo han OFW kun ira ig-aapilar o magsasampa hin motion for reconsideration kasumpay han desisyon han hukmanan.#
