Isumat.com/ Marso 20, 2023
Gin-utod hin duha katawo an ira kinabuhi ha magkalain nga insidente ha Eastern Visayas ug gintutudlok nga rason han ira paghikog amo an mabug-at nga mga problema nga ira ginpapas-an.
Hadton gab-i han Marso 18, 2023, natad-an nga nabitay an lawas han biktima ginkilala nga hi Augosto Apejas, 68 anyos, ha sulod han ira balay ha Brgy Anibong, Julita, Leyte.
Ha report han Julita PNP, an apo han biktima nga pag-uuli pala tikang ha trabaho an nakadiskubre han panhitabo ngan kadagmitan nangaro hin bulig ha kapitan han mao nga barangay basi igpasabot ha kapulisan an insidente.
Pagkadto han mga otoridad han lugar, ira nakit-an nga nagbitay pinaagi hin nylon nga higot an biktima. Nagsumat an apo ni Apejas nga pira na ka tuig nga namimingaw an iya lolo han iya anak nga adto ha Manila nga maiha na hin duro nga waray uli-uli.
Samtang didto naman ha Tolosa, Leyte, iginreport han kapulisan an gin-aalegar nga paghikog han biktima ginkilala nga hi Evangeline Rodriguez, 55 anyos, may iginkakalungon, ngan residente han Villa Tolosa-NHA, Brgy Tanghas han nasabi nga bungto.
Pasado alas 2 han kulop, Marso 18, 2023, hira Noel Rizaldo, kalungon han biktima; ngan Roland Rodriguez, anak han biktima; in nagpasabot ha kapulisan nga ira nakit-an hi Evangeline nga nabitay na an lawas ha ira balay.
Gindara pa an biktima ha Rural Health Unit an biktima pero igindeklarar han doktor nga dead on arrival.
Ha pag-asoy han mga anak han biktima, ira na-obserbaran nga pirmi halarum an pagpinanmuruboot han ira iroy han iya sakit ngan problema ha kwarta, labi na an iya sarisari store nga pira na ka adlaw nga sarado. Pira gihapon ka beses nga nakabati hira nga nagsesering hi Evangeline nga mamamatay na hiya ha deri maiha nga panahon.
Dida han duha nga insidente, an mga imbestigador in nagpahayag nga waray hira nakit-an nga foul play.#
