Isumat.com/Hulyo 3, 2023
Dos Syentos mil pesos an ighahatag nga premyo para han hin-o man nga makakaghatag hin impormasyon basi madakop hi Police Staff Master Sgt Van Gregory Benitez.
An PNP-Eastern Visayas in nagpasamwak ha publiko yana nga adlaw han ira paghangyo ha publiko, labi na adton maaram kun hain na yana ini nga pulis-Tacloban nga wanted tungod han kaso nga murder.
Nagsering an PNP Regional Office nga makigsumpayan dayon ha mga estasyon han pulis basi ma-aresto na ini nga akusado hin pagpatay. Nagpahayag pa an PNP nga delikado ini nga akusado kay armado ini.
Naghuhulat an 200k nga pahalipay han makakaghatag hin impormasyon nga magdadalan han kasikmit ni Benitez ngan iginpatapod han PNP nga waray makakasabot han pangilal-an han maghahatag hin impormasyon basi maproteheran an iya seguridad.
An telepono han Tacloban City Police amo ini: 09985986679 / 09176317752.
Hi Benitez in ginkasuhan hin murder ha kamatay ni Jessica Durana, residente han Quarry District District, Tacloban City.
Dida han imbestigasyon, pinusil han suspek an biktima hadton Mayo 3, 2023 han kulop samtang nagbabaktas dida han lugar upod an iya nanay.
Tulo nga igo hin bala ha lawas ngan usa ha butkon an gin-antos han biktima dida han panmusil.
Hira Benitez ngan Durana in gintotoohan nga magkarelasyon subay han ira komunikasyon ha cellphone ngan pagsaysay han iroy han biktima.
Temprano pa hadton Hunyo, hi Tacloban City Police Chief Col Miachel Palermo in nagsumat nga nakakuha hira hin impormasyon nga nagtitinago ha Cebu an suspetsado.
Nagkagawas gihapon an mga notisya nga nagpa-abat nga masurender an suspek pira ka adlaw katapos han insidente pero waray ini matabo. #
