Isumat.com/Hulyo 5, 2023
Sobra na hin 10-anyos nga nagsisinukot hin minilyon-milyon ka pesos nga kaburuhisan an probinsya han Eastern Samar pero tobtob yana, deri la gihapon nagbabayad an upat nga kompaniya hin pagmina nga may operasyon ha isla han Homonhon ha bungto han Guiuan.
Ha notisya han Rappler.com, naabot na hin 133 Milyones pesos an buhis nga angay baydan han Cambayas Mining Corporation, Techiron Resources Inc., Emir Mineral Resources Corporation, ngan Mt Sinai Mining Exploration Corporation.
Dida han pahayag han Provincial Treasurer’s Office, damo na nga demand letters an ira iginpadara ngadto han upat nga kompaniya pero waray positibo nga kabatunan.
Kun susumahon, tikang pa han tuig 2012 ini nga kabaraydan hin buhis para han nakukuha nga mineral dida han ira operasyon, subay han pag-compute han Ore Transport Permit nga igin-isyu han Mines and Geosciences Bureau.
Dida han mao nga pahayag, 96 Milyones an angay baydan han Cambayas Mining; 22 Milyones naman an Techiron Resources, 12 Milyones tikang ha Emir Mineral Resources. ngan 2.5 Milyones pesos an kabaraydan han Mt Sinai Exploration.
Ha ilarum han Local Government Code of 1991 ngan Provincial Ordinance 09-09 Series of 2009, kinahanglan baydan an real property tax tungod kay nakakahikay man hin mineral an mga kompaniya.
Sumala pa han report, an nasabi nga mga kompaniya an nagkukuha hin chromite ha Brgy Casuguran.
An nasabi nga kantidad hin buhis in para la han real property tax, kay mayda pa lain nga kaburuhisan para han mga makinarya ngan ekipahes nga ginagamit ha pagmina.
Nagpahimatngon an Provincial Government nga kun mapakyas an mga kompaniya pagbayad han buhis, may katungod an Provincial Government nga kumpiskaron an mga propyedadis ngan ekipahes han mao nga mga kompaniya.
Hinsabutan nga an mga mining companies in nagbabayad hin excise tax ha National Government, pero waray bayad-bayad han kaburuhisan ngadto han probinsya. # (via Rappler.com)
