Isumat.com/Agosto 4, 2023
Nadugangan na liwat an nagtitikahilaba nga lista hin katawhan nga pinanmatay pinaagi hin panmusil ha Calbayog City, Samar.
Kakulop, Agosto 3, 2023, an mga nagkabibiktima in lalaki ngan babaye ha magkabulag nga insidente hin pamusil ha nasabi nga syudad.
Ha report tikang ha PNP Regional Office, an usa nga shooting incident in natabo alas 9:11 han gab-i ha Maharlika Highway, Brgy Bagacay, Calbayog City kun diin an biktima in ginkilala nga hi Harold Bernate alyas Lintoy, ulitawo, ngan nag-uukoy ha Brgy Obrero han mao nga syudad.
An mga suspetsado nga tulo katawo in waray panhikilal-i nga kumalagiw dayon katapos han krimen.
Ha inisyal nga imbestigasyon, an biktima in nagliliningkuron ha nakaparada nga motorsiklo ligid han kalsada han tigda la hiya pagpanmumuslon han mga suspetsado. Nag-antos an biktima hin pira nga igo hin bala ha lawas rason han iya kamatay.
Samtang ha report han Samar Daily News Online, usa nga babaye an namatay katapos pusilon ha Brgy Matobato, Calbayog City, kakulop han udto.
Ginkilala an biktima nga hi Joseline Bago, barangay secretary ngan residente han Brgy Imelda, Almagro, Samar.
An biktima in nag-antos hin igo hin bala ha ulo.
Waray gihapon panhikilal-i an mga suspetsado nga umiskapo katapos han krimen. #
