Isumat.com/Agosto 4, 2023
Nakasalbar ha peligro ngan aada na yana ha maupay nga kahimtang an mga pasaheros ngan tripulante han nalunod nga motorboat ha kadagatan han San Antonio, N. Samar hadton aga han Agosto 2, 2023.
Subay han impormasyon tikang ha San Antonio PNP Station, natimamangno na han mga otoridad an ngatanan nga sakay han MB Spirit ngan waray naawat nga kinabuhi.
An nasabi nga sakayan pandagat in lumakat ha pantalan han San Isidro alas 8 han aga ngan tikadto unta ha isla nga bungto han San Vicente.
An kapulisan ha San Antonio in nakakarawat hin tawag mahitungod han insidente ha kalalawdan ngan kadagmitan nira ini ginkadto upod an mga rescuers han Municipal Disaster Risk Reduction management Office.
Malinangpuson nga nasalbar an 48 katawo nga sakay han MB Spirit nga ginlalakipan hin kabataan ngan mga senior citizens.
Ha report han PNP, an sakayan in nakabunggo hin naglulutaw-lutaw nga kahoy hinungdan nga nalunod ini.
Ginkurna an nasabi nga sakayan ngadto ha kabaybayunan han Brgy Ward III ha bungto han San Antonio. #
