Isumat.com/7:20AM,July 03,2020
Tungod han pag-agawi hin tagay ngan pagsulsol, waray kapugngi an kapungot hin usa nga ulitawohay ngan iya brutal nga ginpatay an iya kahampang ha pag-irignom.
Sumala han report han Matalom, Leyte PNP Office, an suspetsado nga 14-anyos upod an iya upat nga kakilala in nag-aragmot hin tag-10 pesos basi makapalit hin makahurubog nga irimnon.
Dida han nagtatagay-tagay na hira, an biktima nga ginkilala kan alias Amang in pira ka beses nga iya gin-aagaw an tagay nga para han suspetsado. An iya pa gud mga ka-inom in nagsisinulsol pinaagi hin pag-intremis nga patayon niya hi Amang.
Ini nga ka-init han ulo in natirok ha alimpatakan han ulitawohay ngan iya ginhulat nga matapos an irignom ugsa niya ginbuhat an iya maraot nga plano. Pagburublag nira, iya ginbantayan nga umuli hi Amang didto dapit han may merkado han bungto.
Waray pakabulos hi Amang kay gin-andam gud han suspetsado an iya plano nga krimen. Ginpu-agan hin bato an ulo han biktima, ngan kataliwan ginlaslas an li-og. Waray pa makuntento an suspetsado, iya ginbuno ha tiyan an biktima ngan ginbunlot tipagawas an tina-i. Naghimo-himo pa gud hin krus an suspetsado ngan iya ginbawbaw ha lawas ni Amang.
Katapos hini, pumakadto an suspetsado ha presinto ngan iginreport niya ha pulis nga nakakita hiya hin tawo nga baga hin patay didto han merkado.
Pero dara han hingpit nga imbestigasyon han mga pulis ug pag-asoy han mga testigo, hinsabutan nga an ulitawohay an naghimo han makangingirhat nga krimen.
Gumawas gihapon ha imbestigasyon nga an kag-anak han suspetsado in na-ukoy ha Calbayog City, ngan pumakadto la hiya ha Matalom hadton 2018 kay taga didto an iya nanay. Hinsabutan gihapon nga palaboy-laboy an suspetsado ngan barubalhin hin bungto ha Leyte ngan Southern Leyte.
Kataliwan han ka-aresto ha iya, ginturn-over hiya ha Calbayog PNP para han kaangayan nga disposisyon komo menor de edad nga nakagbuhat hin krimen. #
