Isumat.com/10:08AM,June 27, 2020

Waray naton mahihimo kundi sumunod han mga patakaran nga gin-implementar tungod han COVID-19 pandemic, sanglit kun bumalik ha Ormoc hi WBO Bantamweight Champion John Riel Casimero, igpapailarum gihapon hiya han duha ka semana nga kwarentina.

Ini an nagin reaksyon ni Mayor Richard Gomez han makasabot hiya nga plano han Ormocanon nga boksingero nga umuli la anay ha iya lugar kay minimingaw na hiya ha Estados Unidos. Hi Gomez in nagpahayag nga abri an syudad pagkarawat kan Casimero ha kondisyon nga tim-os nga iya susundon an strikto nga proseso han kwarentina.

Ginsagdunan ni Gomez an kampeon nga seguraduhon nga kumpleto hiya han mga papeles basi maka-uli ha Pilipinas ngan pag-abot ha Ormoc, maagi hiya han mandatory nga 14 ka adlaw nga kwarentina.

Kun manunumduman, temprano pa yana nga tuig, lumakat na hi Casimero ha Amerika para han iya training kontra kan Naoya Inoue han Japan nga amo an hadi han WBO ngan IBF bantamweight division. Mag-aasdangay unta an duha dida han Abril para hin unification title bout. Pero waray ini madayon tungod han COVID pandemic ug hi Inoue in nagpabilin ha Japan.

An kampo ni Inoue in nagpahayag nga posible didto pa hiton Setyembre makabiyahe an Hapones ngadto ha Amerika ngan bangin magbag-o an desisyon niya ngan deri na sumogot nga makigpanta kan Casimero. Tungod hini, hi Casimero in naka-istambay yana ha Florida ug nabibitay an iya mga plano.

Naghihingyap hiya nga makabalik la anay nganhi ha Pilipinas ngan mabiyahe nala utro ha Amerika kun masegurado na an iya sunod nga away ha ring. Nagsumat hi Casimero nga karuyag na niya igka-urusa an iya minahal ha kinabuhi ngan pamilya.

Hi Casimero in nagin kampeon han iya patumbahon hi anay WBO champion Zolane Tete dida han ira championship fight ha Englatera han una nga tuig. # (KEVIN SIOSANA)