Isumat.com/Setyembre 9, 2022
Kritikal an kahimtang han usa nga biktima samtang an usa in talwas na ha peligro ngan mayda na gintutumbok nga “Person of interest” an mga imbestigador han Tacloban PNP.
Ini an gibabag-uhi nga update nga iginpasamwak ni Tacloban PNP Spkesperson Major Marjorie Manota yana nga aga, Setyembre 9, 2022, kasumpay han natabo nga shooting incident ha Tacloban City Fishport (kakulop han maagahon, Setyembre 8, 2022.
Sumala kan Manota, kritikal an kahimtang ni Arnie Lagarto. Ini in tungod han duha nga igo hin bala ha iya. An usa nga bala in nakaigo ha iya too nga talinga ngan lumahos ha may parte han baba, samtang may igo liwat ha iya likod nga tumahos ha dughan.
An usa nga biktima, hi Gilbert Beringuel, in talwas na ha kadelikaduhan, pero waray mahipayag kun ano nga parte han lawas an naigo.
Nagsering pa hi Manota nga subay han imbestigasyon, an fish broker ngahi Lagarto an target han suspetsado, ngan na-angyanan la hi Beringuel.
An mga biktima in gintatambal ha Divine Word Hospital.
Duha nga basiyo hin bala hin kalibre 45 nga pistola an nakuha didto han lugar han krimen.
Hi Manota in nagpahayag nga mayda na person of interest nga gintutumbok an mga otoridad, pero waray hiya maghatag hin kadugangan nga detalye hini nga tawo basi deri makadiskarel han imbestigasyon ngan paghalpat han suspetsado.
Iginpahayag pa han opisyal nga waray nagboboluntaryo o naghahatag hin pahayag tikang han mga tawo nga didto han lugar han matabo an krimen.#
