Isumat.com/Setyembre 13, 2022
Gintotoohan nga gintikasan anay antis panmatayon in duha nga kababayen-an nga senior citizens hadton gab-i han Setyembre 11, 2022 ha Sitio 6, Brgy Tinago, Palompon, Leyte.
Ha imbestigasyon han kapulisan, ginkilala an mga biktima nga hira Lourdes Verano, 79 anyos ug an iya anak nga hi Josefina Verano Sumayong, 62 anyos, inasaw-an ngan retirado nga maestra.
Subay han record han Palompon PNP, temprano pa han aga han Setyembre 12, may nagsumat ha ira nga may natabo nga pangawat didto han nasabi nga lugar. Nakit-an han mga kapulisan ha sulod han balay nga waray na kinabuhi an duha nga biktima ngan may mga binun-an ha magkalainlain nga parte han ira lawas.
Usa nga amyaw han mga biktima an nag-asoy nga mayda niya nakit-an nga duha nga kalalakin-an nga gumawas tikang han balay han mga biktima han maagahon ngan sumakay hin motorsiklo. Waray niya hikilal-i an duha nga kalalakin-an.
Antis hini, nakabati an amyaw nga mayda mga guli-at nga iya nabati-an tikang han balay antis gumawas an kalalakin-an.
An mister ni Josefina in nagpahayag nga waray hiya didto han balay han matabo an insidente ngan nagtotoo hiya nga an mga suspetsado an nagtikas han 100 Mil ka pesos nga ira ganansya tikang han ira umhanan.
An mga otoridad in nagpapadayon pag-imbestigar han panhitabo ngan pagdakop han mga suspetsado. #
