Isumat.com/Setyembre 9, 2022
Ha sulod la hin duha ka adlaw, tulo ka tawo an binawi-an hin kinabuhi ha magkalainlain nga insidente hin panmusil ha Sinirangan Bisayas.
Hadton Setyembre 7, 2022 an parag-uma nga hi Oscar Porlaje in namatay han pusilon han suspetsado ginkilala nga hi Alipio Turcolas Jr. An biktima ug an gintatahapan in mga residente han Brgy Libas, Pambujan, Northern Samar kun diin natabo an insidente pasado alas 11 han aga.
Ha inisyal nga imbestigasyon, hira Porlaje ngan Turcolas in nagkaada hin mapaso nga argumento. An biktima in may bitbit nga sundang ngan iya gintarhog hi Torculas nga iya papatayon upod han iya mga anak. Umuli hi Torculas ngan kumuha hin home-made shotgun ngan bumalik ngadto kan Porlaje.
Igin-alegar nga gin-atake ni Porlaje hi Turculas gamit an sundang ngan dida hini ginpabuthan han suspetsado an biktima gamit an “Bardog” nga pusil. Naigo hi Porlajes ha ulo rason han iya kamatay samtang an suspetsado in sumurender ha kapulisan.
Didto naman ha San Jose, Northern Samar, namatay hi Eduardo Valera Jr han pusilon hin waray hikilal-i nga suspetsado alas 10 han aga, Setyembre 8, 2022 ha National Highway, Brgy Tingzon han nasabi nga bungto.
An biktima in paragbaligya hin gasolina ngan residente han Brgy Urdaneta, Lavezares, Northern Samar.
Subay han imbestigasyon hi Valera in nagkokolekta hin bayad han iya negosyo tikang hin usa nga tindahan hadto nga takna, Pagbalik niya ngadto han iya multi-cab, ginda-op hiya han suspetsado ngan duha ka beses pinusil hiya ha ulo.
An suspetsado in kadagmitan umiskapo sakay hin usa nga motorsiklo.
Samtang, usa nga parupangisda an naawat an kinabuhi han pusilon samtang nagmamaneho hin motorsiklo pasado alas 4 han kulop, Setyembre 8, 2022 ha Brgy Tabing, tabango, Leyte.
Ginkilala an biktima nga hi Jerome Dayon, inasaw-an, ngan nag-uukoy ha Brgy Parel, San Isidro, Leyte.
Hi Dayon in nagmamaneho hin motorsiklo ngan iya angkas hi Renan Lascona. Tigda la nga umulpot tikang ha luyo an mga suspetsado nga sakay liwat hin motorsiklo. Ginpusil an biktima ngan natumba an motorsiklo. An backrider nga hi Lascona in nakadalagan ngan nakagtago.
Hi Dayon in naigo hin bala ha ulo hinungdan han iya kamatay on the spot, samtang kumarida dayon an mga suspetsado tikadto nga dereksyon ha San Isidro.
An mga otoridad in nagpapadayon pag-imbestigar han nasabi nga mga panhitabo. #
