Isumat.com/ Disyembre 22, 2022
Magigin mamurayaw, talwas ngan hapsay para han mga mulopyo ha Sinirangan Bisayas an pagsa-urog han Pasko ngan Bag-o nga tuig.
Ini an iginpasarig ni Col. Erwin Rommel Lamzon, Deputy Commander han kanan Philippine Army 8th Infantry Division nga nakabase ha aton rehiyon. Ini nga iya pagseguro an iginpabati durante han Media Forum ha Hotel de Fides, Disyembre 21, 2022.
Nagsering hi Lamzon nga an mga kasundaluhan in naka-alerto ngan andam paghimo han kaangayan nga aksyon basi masegurado nga talwas ngan mahimyang ini nga mga selebrasyon yana nga Disyembre. An mga tropa han Philippine Army in mahugot an pagmanman kontra han mga gi-os han kaaway han gobyerno labi na an kumunista nga terorista nga grupo han New Peoples Army, pahayag pa han opisyal.
Ha kasaysayan han Pilipinas, an mga rebelde nga kumunista in pirmi naghihimo hin pagsamok kun magtitigaman hira han anibersaryo han Partido Kumunista kada Disyembre 26. Tungod hini, pirmi naka-alerto an militar labi na yana nga mga panahon, dugang pa han koronel.
Ginhihimo han mga rebelde an pagsamok basi ira igpakita nga mayda pa nira pwersa, pero ha kamatuoran, dako na hin duro an ira kapi-angan tungod han kamatay han ira Founding Chairmen Jose Maria Sison sugad man han iba pa nga higtaas nga opisyales han kagi-usan. Iginsumat pa ni Lamzon nga damo na gihapon an nagsurender nga mga rebelde ha Eastern Visayas ngan narekupo nga mga armas han mao nga grupo.
Nagsagdon hi Lamzon ha publiko nga magin ikmat ngan maghirot labi na ha mga lugar nga naghuhuruot an katawhan kay kasagaran amo ini an ginpupuntirya han mga rebelde nga NPA.
Nanawagan liwat hiya ha mga batan-on nga deri magpahugay ngan mag-inapi-api hin mga aktibidad han walhon nga grupo kay waray dadangatan nga maupay an ira kabubwason.
Iginpaparayaw gihapon ni Lamzon nga hitaas an trust rating o pagtapod han publiko ha pwersa armado han Pilipinas subay han mga surveys ngan ini in nagpapakita nga may kapas an AFP pagproteher han mga sibilyan tikang han mga tarhog hin kasamok ngan bayolente nga aktibidad han CPP-NPA-NDF.
Igindugang pa han opisyal nga labot la han pagsurapo han mga rebelde, masasarigan gihapon an militar ha pagbulig pagpa-uswag han nasud ngan paghatag hin serbisyo ha panahon han kalamidad. #
