Nadugangan hin usa ka tawo an mga nagpositibo han corona virus denhi ha Sinirangan Bisayas, ini in subay han gibabag-uhi nga pasamwak tikang ha DOH-Region 8 nga iginpagawas yana nga gab-i.
Sumala han impormasyon, hi Patient #14 in usa nga babaye, 54 anyos ngan taga Brgy Mercedes, Catbalogan City. Hiya in nagtatrabaho ha Local Government Unit han Tarangan, Samar kun diin siyam na ka tawo didto han bungto an natapnan han virus.
Ini nga Catbaloganon amo an iginka-urusa kan Patient #2 hadton Marso 16. Posible gihapon nga an nakatapon ha iya an iba pa nga nag positibo ha Tarangnan. Nagpakita hiya hin sintomas han virus hadin Abril 24 ngan ngan ginkuhaan hiya hin swab sample. Nahipadara ini ha Cebu ngan gumawas ha resulta han confirmatory test nga positibo hiya.
Nagdumara na an DOH Monitoring Unit hin contact tracing han mga iginkahibalag hini nga taga Catbalogan dida han iya panimalay ngan barangay ngan nag negatibo an ira mga samples. An DOH in nakikigsumpayan na yana ha Samar Provincial Health Office para han monitoring kan Patient#14.
An swab samples ni Patient#14 ug an iya close contacts in lakip dida han Batch 13 han samples nga iginpadara ha Cebu. Dida hini nga Batch ginkokomponer ini hin 133 nga samples, amo la ini an positibo, pero mayda pa tulo nga samples nga ginhuhulat an resulta. Lakip gihapon hini nga batch an mga close contacts han mga naha-una nga kaso ha Burauen, Leyte pero negatibo an resulta.
Dida naman han Batch 14 samples, kanan 50 ini ka tawo. 13 na an natestingan ha Cebu ngan ngatanan negatibo, pero mayda pa 33 hini nga batch an padayon pa an pagproseso han ira samples.
Hapagkayana naabot na hin 14 ka tawo ha Region 8 an natapnan han kagaw. Nagpapabilin an panawagan han DOH ha publiko nga igpadayon an mga pitad ha paghirot kontra han makamaratay nga kagaw. # (KEVIN SIOSANA)
