Isumat.com/9:01AM,May 2, 2020
Para han mga nag-eehersisyo ngan mga joggers ngan para na gihapon ha publiko: Mahugot nga igindederi an pagsulod o pagharani ha Balyu-an Park area, Magsaysay Blvd, Tacloban City.
Iginpapasabot han Tacloban Bureau of Fire Protection (BFP) nga gindudumara ha Balyu-an Area an decontamination ngan disinfection han mga ambulansya nga nagdadara han mga COVID-19 Patients tikang ha iba nga lugar nganhi ha syudad han Tacloban.
Dara hini, deri puede pumakadto hini nga dapit an bisan hin-o dara han kadelikaduhan nga puede igdurot hini. Sanglit nagsering an BFP nga an mga joggers o naghihimo han ira physical activities in gindidid-an la anay nga pumakadto.
Kakulop, Mayo 1, naghimo hin decontamination dida hini nga lugar para han ambulansya nga ginsakyan han bag-o nga nagpositibo han kagaw tikang ha Tarangnan, Samar.
Ini man gud nga lugar in nabatasanan na nga ginkakadtu-an han mga mahilig mag-ehersisyo kay kulang hin sarakyan ngan presko an hangin labi na kun aga-aga pa. Ngani dida han Enhanced Community Quarantine, gintugutan an pag-ehersisyo han katawhan dida ha Magsaysay Blvd basta sumunod la han health protocols.
Yana, gin-aabisuhan na an publiko nga deri na magharuharani ngadto ha may Balyu-an Park tungod hini nga sitwasyon. Puede la gihapon ha kahilab-an han Magsaysay ug ha City Hall Grounds mag ehersisyo, an deri la puede an pagpakadto ha Balyu-an Area.# (KEVIN SIOSANA)
