An kaparte han downtown area ha Catbalogan City. (Photo by wikipedia)

Isumat.com/8:10AM,May 4, 2020

Iginmando ni Catbalogan City Mayor Dexter Uy nga igpasunod an Restrictive Quarantine o “lockdown” ha Brgy. Mercedes han nasabi nga syudad.

Ini in katapos la igpahayag han DOH-Region 8 nga mayda usa ka tawo nga residente han mao nga barangay nga nag positibo han corona virus. Ini nga babaye amo in 54 anyos nga nagtatrabaho ha LGU-Tarangnan kun diin gintotoohan nga didto hiya natapnan. An Tarangnan in mayda na siyam nga mulopyo nga COVID Positive.

Kagab-i, dayon nagpalusad hin kamanduan hi Uy nga an Mercedes in aada na ha lockdown ngan iginbalik an istrikto nga pagpatuman han health protocols, lakip na an tag-usa na la ka tawo an puede pag gawas han balay ngan iginbalik liwat an pagbantay han mga barangay officials ngan mga kapulisan.

Gin-aaghat gihapon han alkalde an mga tawo nga iginka-urusa hini nga pasyente nga magpasabot ha LGU ngan magpa-ilarum hin home isolation.

Ini nga residente han Mercedes amo an ika-14 nga Covid Positive ha Eastern Visayas. Nakatalaan nga dad-on hiya yana nga adlaw ha EVRMC-Magsaysay(Tacloban) kay labot la nga positibo hiya han virus, mayda gihapon niya hypertension.

Kadungan hini, hi Mayor Uy in nagpabati han iya kabido han desisyon han gobyerno nacional nga igpailarum na ha General Community Quarantine an probinsya han Samar. Sumala pa ha iya, unta iginpadayon la anay an Enhanced Community Quarantine dara han peligro hini nga sakit.

Nanginyupo gihapon hi Uy ha mga Catbaloganon nga sundon gud hin hul-os an mga patakaran han gobyerno labi na yana nga mayda na nagpositibo han makamaratay nga kagaw ha ira lugar.

Mayda na mga close contacts hini nga pasyente an nakuhaan hin swab samples ngan negatibo an resulta han laboratory test. Pero nagpapadayon an contact tracing basi maseguro gud nga ngatanan han iya iginkahibalag in mababantayan an panlawas. # (KEVIN SIOSANA)