Isumat.com/ Marso 22, 2023
Nagka-aawat an kinabuhi hin sundalo ngan rebelde nga NPA ha asdangay han mga tropa han gobyerno kontra han terorista nga mga kumunista ha kabubkiran han Brgy Geparayan de Turag, Silvino Lobos, N. Samar, hadin Marso 20, 2023.
Ha report han Philippine Army 8th Infantry Division, humagos hin 20 minutos an engkwentro kun diin namatay hira Army Pvt Modesto Lutob ug an waray pa kakilal-i nga rebelde nga ginbayaan han iya mga kaupdanan nga umiskapo. Nakuha gihapon han kasundaluhan in usa nga M-16 rifle nga armas han mga rebelde.
An nagkumbati nga mga hugpo amo an mga tropa han 4th Scout Ranger Masigasig Battalion ngan pito nga rebelde nga miembro han Front Committee 1, Sub-Regional Committee Emporiurm han CPP-NPA-NDF Eastern Visayas.
Subay han report, an 803rd Infantry Brigade in ginsumatan hin sibilyan nga an mga rebelde in nangingikil hin kwarta didto han barangay, sanglit pumakadto han lugar an mga sundalo ngan natabo an pupsilay.
Hi 8th ID Commander Major General Camilo Ligayo in nagpabati han iya pakigsaro han kabido-an han pamilya han namatay nga sundalo. Sering pa han heneral, igin-alay han sundalo an iya kinabuhi ha pagserbe han katawhan ha Northern Samar para makab-utan an dayuday nga kamurayawan ngan kauswagan.
Utro gihapon nga igindig-on han militar nga deri hira mahunong paghalpat han mga rebelde basi matapos na an terorismo nga ginawi-an kontra han katawhan.
Samtang, usa naman nga kaapi han NPA in sumurender ngadto han mga otoridad ha Marabut, Samar kakulop, Marso 21, 2023.
Hiya in usa nga lalaki, 23 anyos, ngan residente han Basey, Samar. Sumala ha iya, miembro hiya han medical team han Bugsok Squad tikang pa han tuig 2019.
Iya iginsumat ha mga otoridad nga upod hiya han grupo han mga rebelde nga responsable pag-ambush han kapulisan nga miembro han PNP Regional Mobile Force Battalion ha Brgy Libuton, Borongan City, Eastern Samar hadton 2019.
Upod gihapon hiya han grupo han NPA nga igin-engkwentro kontra han Philippine Army ha Brgy Bagti, Basey, Samar hadton 2019.
Ini nga nagsurender in aada ha kustudiya han 802nd Mobile Force Company para han kaangayan nga disposisyon.
Nagin mabinungahon an paningkamot han PNP Regional Intelligence Division han ira makumbinser an mao nga rebelde nga bumalik ha piyod han balaud. #
