Isumat.com/7:38AM, Pebrero 23, 2021
Pira na ka bulan an nakalabay, iginsaad ni Mayor Aran Boller nga masosolbar an problema han insureksyon ha Matuguinao, Samar sunod nga tuig, ngan sugad-sugad nga nagtitikadako an tsansa nga matutuman ini tungod han pagsurender hin sobra usa ka gatos nga mga rebelde ngan mga supporters han kumunismo nga kagi-usan.
Hadin Pebrero 19, maabot hin 118 nga anay rebelde ngan NPA supporters an pormal nga bumalik ha piyod han gobyerno pinaagi han LGU ngan 19th Infantry Battalion han Philippine Army. Sumala pa han report, lakip han nagsurender in 9 nga barangay officials.
Kun manunumduman, hi Boller in naghatag hin ultimatum nga tobtob la Pebrero 15 an ira ighahatag nga panahon para han mga rebelde ngan tagsuporta han mga terorista ha iya bungto nga sumurender na, kay kun deri hira in sasampaan han kaangayan nga mga kaso.
Dida han syahan nga impormasyon, 353 katawo unta an natudlok nga masurender, pero ha katapus-tapusan 118 nala an nagpakita ngan opisyal nga nanumpa hin pagdapig ha gobyerno ngan pagsalikway han kumunismo.
An mga nagsurender in ginlalakipan hin 56 nga miembro han Sangay sa Partido ng Lokalidad (SPL), 50 nga kaapi han Yunit Militia (YM), ngan 12 tikang han Organisadong Masa (OM).
Samtang, usa naman nga rebelde nga ginbayaan han iya mga kaupdanan han mamatay hiya dida hin engkwentro an gintagan hin desente nga paglubong han gobyerno. An rebelde nga waray kakilal-i in natad-an ha Brgy Cagbigaho, Pambujan , Northern Samar.
Nahireport nga dida han Pebrero 15, nagka-enkwentro an Philippine Army ngan NPA didto han lugar ngan ginbayaan an patay nga lawas han rebelde han mangiskapo an iya mga kaupdanan.
An patay nga lawas an gintubyan han Phil Army ha Pambujan PNP Station. An kapulisan an nagtimangno ngan nagpalamay pa hin tulo ka adlaw han patay didto han auditorium han bungto antis iglubong ha sementeryo.#
