Isumat.com/8:13AM, Pebrero 23, 2021

Nag-umento an presyo han bugas ha aton dapit yana nga bulan han Pebrero, pahayag han Grains Retailer Confederation-Region 8 (GRECON).

Nagpahayag an GRECON, an paghitaas han presyo in tungod han pagkulang hin lokal nga suplay kay ha Marso pa ngan Abril an pagbari o kat-ani han humay ha Eastern Visayas.

Tungod hini nga sitwasyon, waray mahihimo an mga retailers ug an mga parabaligya ha merkado kundi pahitas-an an presyo han produkto. Ini in iginkakadungan liwat han deri pa nabalik ha “normal” nga presyo han isda ngan karne sugad man utanon ngan mga panakot.

Kadam-an nga kunsumidor in nababaraka nga magpapadayon an paghinitaas han mga presyo han panguna nga papliton tungod han waray hunong nga umento kada semana han presyo han petroleum products.

Upat na ka semana nga sagunson nga pirmi naabot hin piso an umento ha presyo kada litro han gasolina ngan diesel. #