Isumat.com/7:54AM, October 27, 2020
An Eastern Visayas an nagigin transhipment point han iligal nga droga basi mahingadto ha iba nga rehiyon, sumala kan Atty Gilbert Buenafe, Regional Director han Philippine Drug Enforcement Agency-Eastern Visayas.
Dida han programa nga Siruswerte ha PIA (Philippine Information Agency-8), iginbuyagyag ni Buenafe nga an mga droga tikang ha Metro Manila ngan Cavite an iginbibiyahe nganhi ha Tacloban para hin temporaryo nga paghipos, ngan igbabalhin na ngadto han pinal nga destinasyon nga amo an Cebu ngan pira nga parte han Mindanao.
Partikular nga gintudlok han opisyal an Cebu nga amo gud an ginbabagsakan han damo nga kargada han iligal nga droga.
Sering pa niya nga mahugot an pagbantay han PDEA Agents ha mga pantalan ngan entry points han rehiyon. Iya pa iginsaysay nga kasagaran han ira narerekupo nga mga ginbibiyahe nga droga in tungod han mga impormasyon tikang ha PDEA-Manila sugad man mga sibilyan nga nagpapadangat han mga alarma kasumpay han magkaka-abot nga droga.
Ginklaro naman ni Buenafe nga kun igkukumparar na iba nga rehiyon, deri gud grabe an operasyon han illegal drugs denhi ha Eastern Visayas. Deri angay ika-alarma an sitwasyon han droga denhi ha rehiyon, pahayag pa han opisyal.
Kadungan hini, nanawagan hi Buenafe ha mga Local Government Units nga makigsumpayan ha ira ahensya basi makagtukod han “Balay Silangan” didto han ira mga munisipalidad. Ini nga proyekto in basi makabulig para han mga nanhidabi han iligal nga droga nga magpa-ilarum hin rehabilitasyon ngan magbag-o ha ira kinabuhi.
Pira na nga mga lugar han rehiyon an nakagtukod na hini ngan andam na magtikang an operasyon. Ini in namumutang ha Basey, Catbalogan, Talalora, Sta Rita ha Samar; ngan San Miguel ug Palo ha Leyte.
Nakatalaan gihapon nga magkaka-ada han Balay-Silangan ha deri maiha nga panahon an Tacloban, Barugo, Calbayog, Laoang, Almeria, Baybay, Abuyog ngan Hinunangan. An mao nga proyekto in pinaagi han pagburublig han mga LGUs, PDEA ngan Department of Health, dugang pa ni Buenafe. #
